Тываның Баштыңы Владислав Ховалыгның удуртулгазы-биле Тыва Республикада террорга удур комиссияның болгаш Тывада оперативтиг штабтың пландан дашкаар каттышкан хуралы болуп эрткен.
Айыыл чок чорук база эрге-хоойлу камгалаар органнарның төлээлери, ТР-ниң Чазак Даргазының оралакчылары, регионнуң одалга-энергетика организацияларының удуртукчуларының киржилгези-биле болган ужуражылгага, хөй-ниитиниң айыыл чок чоруунга бооп болгу дег айыыл-халаптарны болгаш амыдырал-хандырылганың чугула объектилерин камгалаар хемчеглерни чугаалашкан.
Владислав Ховалыг ужуражылганы ажыдып тура, бөгүнгү байдал дарый болгаш харыысалгалыг хемчеглерни негеп турарын демдеглээн. Террорга удур комиссия даргазының оралакчызы, Тывада оперативтиг штабтың начальниги, РФ-тиң ФАА ТР-де эргелелиниң начальниги Максим Бережок база Тывада АТК-ның болгаш оперативтиг штабтың кежигүннери – ТР-ниң ИХЯ-ның, Росгвардияның ТР-де эргелели, Россияның ОБЯ ТР-де кол эргелелиниң, ТР-ниң Одалга болгаш энергетика яамызының, ЧЭК компанияларының удуртукчулары алдынган немелде хемчеглерниң дугайында илеткеп, айыыл чок чоруктуң хемчеглерин күштелдирериниң санал-оналдарын киирген. Тыва талазы-биле кол федералдыг инспектор Александр Вавилихин элээн каш арга-сүмелерни берген.
Республикада чамдык объектилерни немей хынаан, чер-черлерде полицияның болгаш күрүне автоинспекциязының доскуулдарын Росгвардия төлээлери-биле быжыглаан. Тыва «кулибиннерниң» онзагай арга-дуржулгазын калбаа-биле ажыглаар. Тываның Баштыңы регионнуң чогуур эрге-чагырга органнары дээди командылалдан даалгаларны ап, чогуур хемчеглерни чорутканын демдеглээн.
«Айыыл чок чорук системазында хөй-ниитиге дыңнадыг системазын болгаш өске-даа кол угланыышкыннарны хынап, бүгү-ле күштерни белен байдалга турарын база катап контрольдаар херек. Стратегтиг объектилер турар девискээрлерге Росгвардияның, ИХЯ-ның, кожууннарда күрүнениң автоинспекциязының хыналдазын күштелдирерин, транспорт хынаар пунктулар санын көвүдедирин дугуруштувус» – деп, Владислав Ховалыг ужуражылга соонда чугаалаан.
Частың болгаш Күш-ажыл байырлалдарынга, Ада-чурттуң Улуг дайынынга Тиилелгениң 80 чылынга тураскааткан байырлыг болгаш ниитилел-политиктиг хемчеглерин белеткеп, эрттирер үеде терроржу болгаш экстремисчи болуушкуннарны болдурбазынче угланган немелде хемчеглер көрдүнген Тывада айыыл чок чоруктуң айы май 20-де доозулган.
Бо чоокку үеде Тывага чамдык стратегтиг объектилерге айыылды тургузуп болгу дег байдалдарже оперативтиг албан черлериниң дүрген хөделиишкинин көргүскен террорга удур каттышкан өөредиглер эртер.
