«Айыыл чок чоруктуң лабораториязының» көжүп чоруур комплекизи дыштанылга лагерьлеринде уругларны өөредип турарын ТР-ниң Өөредилге яамызы дыңнаткан.
«Айыыл чок чоруктуң лабораториязы» Бай-Тайга, Барыын-Хемчик база Мөңгүн-Тайга кожууннарда уругларның чайгы дыштанылга лагерьлеринде үнүүшкүннүг кичээлдерни эрттирип турар. Ук кичээлдер уругларны орукка айыыл чок чорук чурумунуң, орук шимчээшкининиң харыысалгалыг киржикчилери болур кылдыр шын чаңчылдарны тургузарының үндезиннеринге өөредиринче угланган.
Кичээлдер үезинде уругларга орукка айыыл чок чоруктуң, орукту чадаг улус кежер чер-биле кежериниң база чадаг-терге, самокаттарга шимчээшкиннерниң дүрүмнерин тайылбырлап турар. Уруглар шиңгээдип алган билиглерин практика кырынга ажыглап, боттарын пассажир, чадаг-тергечи болгаш чадаг кижи ролюнга шенээннер.
«Айыыл чок чорук лабораториязы» көжүп чоруур комплекс июль айның эгезинден тура, Тываның девискээринде уругларның дыштанылга лагерьлери – Улуг-Хемниң «Чодураа», Каа-Хем кожууннуң «Бельбей», Чөөн-Хемчик кожууннуң «Шуралгак», а ол ышкаш «Орленок», «Байлак», «Юность» лагерьлеринге чедип, үнүүшкүннүг кичээлдерин эрттирген. Үнүүшкүннер июль төнчүзүнге чедир уламчылаар.
