Ак-Довуракта тус черниң чылыг-электри төвү ийиги одалга котелун ажылдаткан

Хоорай мэриязының медээзи-биле алырга, декабрь 9-та немелде котелду одап эгелээн. Бөгүнде ийи котел агрегады ажылдап турар, бир котел курлавырда.

Сөөлгү үеде хоорайның хөй квартиралыг бажыңнар чурттакчыларындан квартиралар соок деп хөй санныг хомудалдар мессенджерлерде база социал четкилерде тарап нептерээн. Хоорайның бир уруглар садында чылыг хандырылгазында байдалды база дыңнаткан турган.

ТР-ниң Чазак Даргазының оралакчызы Олег Лукин Ак-Довуракта тургустунган байдалды сайгарып, аңаа ажылдаан. Чылыг-хандырылга бүдүрүлгезинге чедип, тускай мергежилдиглер-биле чугаалашкан. Хыналда үезинде хоорайже чылыг бээр четкилерде температура даштын соокка дүгжүп турар болган. Эксперттерниң түңнелинден алырга, ак-довуракчыларның квартираларында соок байдал - бажың иштиниң четкилери шын эвес ажылдап турарында, азы батареялар болгаш хоорзаларның туна бергенинде болган.

Одалга системазында базыышкынның чедишпезинден хөй аалдыг бажыңнарда суг чүгүртүр насостарны хоорайның чылыг четкизиниң төнчү ийи объектизинде салган болган.

«Чылыг дамчыдылгазын дүргедедир дээш объектиниң ээлери насостарны боттары салганы илереттинген. Ынчангаш объектилерниң системазында базыышкын куду болганындан, кырыкы каъттарже чылыг четпейн турган» - деп, ТР-ниң Чуртталга-коммунал ажыл-агый яамызы тайылбырлаан.

Чөпшээрел чокка коштунган насостарны өжүрген, ооң түңнелинде квартираларда, ада-иелерниң дыңнадыг киирген уруглар садында чылып келген.

Бажыңнар иштинде четкилерниң ажылдаары-биле холбашкан чидиг айтырыгларны илередиринге болгаш оларны чайладырынга бүгү-ле чугула дузаны муниципалдыг тургузугга чедирерин ТР-ниң Чуртталга-коммунал ажыл-агый яамызының удуртулгазынга дааскан. Оон аңгыда, чурттакчыларның хөй санныг дилеглеринге даянгаш, ол ышкаш даштын сооп келгенин көргеш, ийиги котелду ажылдадыр деп чылыг хандырылга организациязы – ЧЭK-4 башкарыкчы компания шиитпирлээн.

Амгы үеде хоорай чурттакчыларының бажыңнарында чылыг өй-тавында дээрзин Ак-Довурактың мэриязы дыңнаткан.

ТР-ниң Чазак Даргазының оралакчызы Олег Лукин хоорайның хөй аалдыг бажыңнарында чылыг хандырылгазын хыналдада алганын демдеглээн. Бир эвес чылыг хандырылгазынга хамааржыр айтырыг тургустуна берзе, Ак-Довурактың чурттакчылары 89235459061 дугаарда “ЧКА тудуг” башкарыкчы компанияның диспетчер албанынче долгап болур.