Сүт-Хөл кожууннуң девискээринде 150 хире кыштагда көдээ ишчилер малын тудуп турарын чагырга даргазы Орлан Монгуш дыңнаткан.
– Малчын турлагларже аргыжар оруктарны болгаш көвүрүглерни хынап четтивис. Ак хемни кежир үстүкү улуг көвүрүг эргижирээн, үндезин септелге негеттинип турар. Ону чаартырда төлевилел-дөзевилел санаашкыннары херек.
Оралакчы дарга Эртине Сарыглар, аныяк сайгарлыкчы Вениамин Ооржак-биле көвүрүг кежииниң техниктиг байдалын тодаргайлап көрдүвүс. Көвүрүгнүң узуну – 56 метр, дооразы барык тос метр, бедии – 5 метр.
Бо хире улуг көвүрүгнү септээрде, хөй тудуг материалдары херек. Кыдыкы баганаларын, ооргаларын бүрүнү-биле солууру негеттинип турар. Ынчангаш ыяшты баш бурунгаар белеткеп алыры чугула.
Ук объект Алдан-Маадыр чонунуң, малчыннарының Манчүрек, Көшпес, Көжээ, Ак, Хөлчүктүг деп черлери-биле аргыжар кол көвүрүү болуп турар.
