Улуг-Хем кожууннуң Эйлиг-Хем сумузунуң чоогунда кайгамчык чараш чурумалдыг хем эриинге хол бөмбүүнүң маргылдаазы болуп эрткенин сумунуң херээженнер чөвүлелиниң даргазы Рада Быштак-оол дыңнаткан.
Улуг-Хем кожууннуң 35 хардан өрү назылыг херээжен улус аразынга элезинге ойнаар хол бөмбүү солун эрткен. Бо маргылдаа Эйлиг-Хем сумузунуң болгаш кожууннуң херээженнер чөвүлелиниң эгелээшкини-биле дөрт чыл бурунгаар болуп эгелээн.
Бо удаада маргылдаага кожууннуң төп эмнелгезиниң, “Хая-Ужу”, “Тиилекчилер”, “Черликтер”, “Үш-Мөөрүк”, "Шагаан-Арыг" командалары ойнап, киришкен.
Хем эрииниң "алдын элезинниг" черинге херээжен хол бөмбүкчүлери хүнзедир ойнаан түңнелинде 1-ги черни – кожууннуң төп эмнелгезиниң командазы (шаңналы чеди муң рубль), 2-ги черни – «Шагаан-Арыг» командазы (шаңналы беш муң рубль), 3-кү черни – "Хая-Ужу" командазы (шаңналы үш муң рубль) чаалап алган.
Хол бөмбүүнүң маргылдаазынга идепкейлиг киришкен командаларны демдеглеп, акша шаңналдарын тывыскан. Бодунуң оюнун тускай көргүскен ойнакчыларны база тус-тузунда шаңнаан. "Эң эки көдүрүкчү" – Кара Уйнукай, "Дески ойнакчы" – Бай-кыс Нава, "Эң эки халдакчы" – Руфина Дакыр-оол, "Эң тергиин камгалакчы" – Сылдысмаа Кунгаа, "Эң улуг ойнакчы" – Светлана Бүрбү, "Тиилелгеже чүткүл" – Руфина Дакыр-оол, "Солун ойнакчы" – Буянмаа Тулуш.
ТР-ниң Дээди Хуралының даргазы К.Т. Даваа, кожууннуң төп эмнелгезиниң командазы, Эйлиг-Хемниң херээженнер чөвүлелиниң кудумчулар аайы-биле идепкейжи кежигүннери, хол бөмбүүнүң хоочун ойнакчызы Валентина Шир-ооловна маргылдааны эрттиреринге үлүг-хуузун киирип, шаңналдарга деткимчезин көргүскен.
Маргылдаа бедик деңнелге эрткен. Ойнакчылар болгаш эрттирикчилер хемге эштип, дыштанып алганнар.
