Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев Новосибирск облазында Күрүнениң күш-ажыл инспекциязының удуртукчузу Вадим Балашов-биле ужурашкаш, хамаатыларның күш-ажылчы эргелерин катап тургузар айтырыгларны чугаалашкан.
Территориалдыг органның удуртукчузу күш-ажыл инспекциязы амгы үеде бооп болур хажыдыышкыннарга удур профилактика ажылынче онза кичээнгейни угландырганын дыңнаткан. Ылаңгыя ажыл берикчилеринге дыңнадыышкыннарны база тайылбырларны берип, баш бурунгаар сагындырыгларны чарлап, профилактиктиг үнүүшкүннерни чорудуп турар.
Профилактиктиг үнүүшкүннерниң кол сорулгазы – ажыл берикчилеринге деткимчени көргүзери болгаш, бир эвес бар болза, хажыдыышкыннарны чайладырының аргаларын кады дилээри. Эрткен чылда 704 профилактиктиг үнүүшкүннерни чоруткан, ол дээрге хыналда-хайгаарал ажыл-чорудулгазының санындан барык сес катап хөй.
Оон аңгыда күш-ажыл инспекциязы бодунуң ажылында ажылдакчыларның эргезин камгалаарда чаа арга – болуп болур “айыылды” илередип эгелээн. Сайгарылга кылырда дараазында көргүзүглерже кичээнгейни салып турар: ажыл берикчизиниң дүшкен деп санаарының дугайында билдириишкинин судтуң хүлээп алганы, ажылчыннарның ортумак статистиктиг саны 50 азы оон хөй кижи; бүдүрүлгеге чиик озал-ондактыг таварылгаларның көвүдээни; күш-ажылдың негелдезинге тускай демдекти салырындан ойталааны.
2024 чылда хажыдылга кылып болур ажыл берикичлеринге 56 хыналданы чоруткан, ооң 95 хуузунда чурум хажыдыышкыннары бары бадыткаттынган. Амгы үеде чаа индикаторларны ажылдап кылып турар.
Бүрүн эргелиг төлээниң чугаазы-биле алырга, күш-ажыл инспекциязы хамаатыларга чугула херек хөй янзы ажылдарны чорудуп турар, ылаңгыя аңгы-аңгы адырларга күш-ажыл эргелерин катап тургузуп, шалың төлевириниң өрезин эгидеринге дузалап турар.
«Бөгүн тускай шериг операциязының киржикчилери ажылдаар төлептиг олуттарны ап, күш-ажыл адырында оларның эргелери бүрүнү-биле сагыттынып турзун дээш, күрүне эрге-чагырга органнары ынаар онза күжениишкиннерни угландырган. Ынчангаш ол категорияның хамаатыларының кыйгырыгларынче немелде кичээнгейни салырыңарны дилээр-дир мен» – деп, Анатолий Серышев чугаалаан.
Ужуражылганың база бир темазы – Россияда ажылдап турар даштыкы хамаатыларның аразында күш-ажыл хоойлужудулгазының күүселдези. Вадим Балашов күш-ажыл инспекциязы болгаш Россияның ИХЯ-зының Новосибирск облазының талазы-биле кол эргелели корум-чурум хажыдыышкыннарын илередири-биле кады ажылдап турарын чугаалаан.
Оон аңгыда, 2025 чылдың январь 1-ден эгелеп, Россияда хоойлуга удур ажылче киирген таварылгалар демдеглеттинген ажыл берикчилериниң даңзызы ажылдап эгелээн. Административтиг чурум үрээшкиннериниң дугайында доктаалдың хоойлу езугаар күш киргенинге үндезилээш, реестрже оларны киирер. Ол чүүл даштыкы хамаатыларның аразында чажыт ажылдаары-биле демисежир арганы бээр.
«Күш-ажыл миграциязының адырында Россия Федерациязының күш-ажыл болгаш үндүрүг хоойлужудулгазының хажыдыышкыннарын, «бүдүүлээн схемаларны» болдурбас дээш, корум-чурум камгалаар, контрольдаар болгаш хайгаараар органнарының, бизнес-ниитилелдиң төлээлери-биле кады демниг хөделири чугула» – деп, бүрүн эргелиг төлээ демдеглээн. Анатолий Серышевтиң чугаазы-биле алырга, ажыл берикчилери-биле немелде тайылбыр ажылы бо таварылгада дээштиг угланыышкын болур.
