РФ-тиң Президентизиниң Сибирь федералдыг округта бүрүн эргелиг төлээзи Анатолий Серышев Студент отрядтар хүнүнүң бүдүүзүнде, Сибирь федералдыг округтуң студент командаларының штабының төлээлери-биле ужурашкан. Ол хемчег Новосибирск хоорайда Сибирьниң күрүнениң транспорт университединге болуп эрткен.
Бүрүн эргелиг төлээ Сибирь федералдыг округтуң студент отрядтарының ажылының чедиишкиннерин бедии-биле үнелээн. Сибирьжилер төлептиг түңнелдерни көргүзүп, чаа рекордтарны тургускан – 31 муң ажыг кижи студент отрядтарга ажылдаан, элээдилерниң күш-ажылчы отрядтарынче беш муң ажыг уруглар кирген деп, ол демдеглээн. «Ажылче хаара туттунган аныяк салгалдың төлээлери «кадык» аныяктар ниитилелиниң кежигүнү апарып, оларның мөзү-шынар үндезиннери быжыг болуп, багай салдарларга таваржырының магадылалы эвээжей бээр» – деп, бүрүн эргелиг төлээ чугаалаан.
Студент отрядтар дайынчылары чурттуң дыка хөй чугула тудугларынга ажылдааннар. Сибирь федералдыг округка бүгү-российжи болгаш регионнар аразының деңнелинде он күш-ажыл төлевилелин организастаан. «БАМ 2.0» – чөөн чүктүң демир-орук девискээриниң хөгжүлдези, Новосибирск облазында “СКИФ” коллективтиг ажыглал төвү, Томск облазының Северск хоорайга «Тайбың атом – депшилге» деп студентилер тудуу, Алтай крайда Белокуриха курорт дээш, оон-даа өске төлевилелдер бар. Үдекчилер, эмчилер, чөвүлекчилер, көдээ ажыл-агый болгаш ачы-дуза студент отрядтары бүдүрүлгениң чугула айтырыгларын шиитпирлеп, келир үениң мергежилдерин практика кырынга шиңгээдип алганнар. Москвага улуг байырлал-биле күш-ажыл сезону доозулган.
Эрткен чыл студент отрядтар дайынчыларынга онзагай болган: аныяктарның хөй-ниити организациязы ийи дакпыр юбилейин демдеглээн – тургустунганындан бээр 65 чылын болгаш шимчээшкинниң амгы төөгүзүнге 20 чыл болганын. Анатолий Серышев 2025 чылдың төп болуушкуну – Ада-чурттуң Улуг дайынынга Тиилелгениң 80 чыл ою дээрзин онзалап демдеглээн. Студентилер шимчээшкини культурлуг болгаш чырыдыышкынныг хемчеглерни белеткээринге база ада-чуртчу болгаш эки турачылар кампанияларын эрттиреринге идепкейлиг киржип турар. Ынчангаш бо чылын «Тиилелгениң десантызы» деп девиз-биле чаңчыл апарган «Харлыг десант» эртер. Акцияның киржикчилериниң мурнунга онза чугула сорулга салдынган: тураскаалдарның байдалын хынаар. «Студент отрядтарның дайынчылары муниципалдыг тургузугларның аныяктары болгаш хөй-ниити идепкейжилери-биле кады, чылып кээрге мемориалдарны болгаш тураскаалдарны, күрүне баштыңының чугаалааны дег, «кылайтыр арыглаарынга» киржип, оларның чаагайжыдылгазынга дузалажыр дээрзинге бүзүрээр мен» – деп, бүрүн эргелиг төлээ ужуражылганың киржикчилеринге чугаалаан.
Бүрүн эргелиг төлээ Россияның Президентизиниң эгелээшкини-биле 2025 чылды Ада-чурт камгалакчызының чылы кылдыр чарлаанын сагындырып, уругларга болгаш элээдилерге дайынның болгаш тылдың маадырларының дайынчы болгаш күш-ажылчы маадырлыг чоруктарының дугайында чырыдыышкын ажылын уламчылаары чугула дээрзин айыткан.
Ужуражылга үезинде, бүрүн эргелиг төлээден сонуургап турар айтырыгларын салып, ол ышкаш 2025 чылдың ноябрь 13-16 хүннеринде Красноярск хоорайга болур Бүгү Россияның студент отрядтар следунга белеткел дугайында чугаалашкан.
Анатолий Серышев студент отрядтар штабтарының төлээлеринге ак сеткилдиг күш-ажылы, социал ужур-уткалыг төлевилелдерни болгаш программаларны боттандырарынга идепкейлиг киржилгези дээш база Сибирь федералдыг округта студент отрядтар шимчээшкинин хөгжүдеринге үлүг-хуузун кииргени дээш Өөрүп четтириишкин бижиктерин тывыскан.
"Россияның студент отрядтары" аныяктарның бүгү-российжи хөй-ниити организациязының Алтайның регионалдыг салбырының “Ватерпас” студент ачы-дуза отряды, Новосибирскиниң регионалдыг салбырының "Индиго" үдекчилер студент отряды, Томскиниң регионалдыг салбарының “Синильга” студент тудуг отряды, Омскиниң регионалдыг салбырының “Кежээки смена” үдекчилер студент отряды, Кузбасстың регионалдыг салбырының “Кофебары” студент ачы-дуза отряды шаңнал алганнарның аразында.
