«Росчетки Сибирь Тываэнерго» компанияның башкарыкчы директору Антон Лукин, Тываның Баштыңы Владислав Ховалыгның депутаттарынга Айыткалынга хамаарыштыр үзел-бодалын берип тургаш, бо чылын энергетиктерниң мурнады көөр айтырыглары апаар регион удуртукчузунуң айытканы элээн каш кол угланыышкыннарны демдеглээн.
Республикада идепкейлиг боттанып турар тудуг төлевилелдеринге энергетика инфратургузуун хөгжүдериниң болгаш энергия-биле хандырар күчү-күштү көвүдедириниң чугулазын ол демдеглээн.
– Эрткен чылдың түңнелдери-биле, тудуг адырында Россияның регионнарының аразында мурнакчыларның бирээзи апарган бис. Ынчалза-даа тудуг объектилерин кожарынга чогуур энергетика инфратургузуу негеттинип турар. Россияның Чазаа 2021 чылдың декабрьда Тывага энергия хандырылгазының комплекстиг планын бадылаан, ында чырыктың күчүзүн 200 МВт чедир улгаттырары көрдүнген. Бүгү Тыва бөгүн ол-ла хемчээлди хереглеп турар дээрзин билип алыры чугула, ол ам оон ийи катап көвүдээр. Бо немелде курлавырлар даг-болбаазырадылга комплекстерин, Кызыл хоорай инфратургузуун хөгжүдер болгаш 2030 чылга чедир тудары планнаттынган чаа чуртталга болгаш социал объектилерин болгаш өске-даа тудугларны чырык энергиязы-биле хандырар – деп, ол чугаалаан.
Бо чылын ажыттынар ужурлуг Хандагайты эрттирилге пунктузунуң тудуун доозары – ажылдың база бир чугула угланыышкыны деп, компанияның башкарыкчы директору медеглээн. Энергетиктер херек инфратургузугну, ооң иштинде 110 кВ бедик вольттуг дузалал станцияны база хуваалда четкилерин тургузарынга киржип турар.
Регионда чырыктың күчүзүн экижидери база бир эчис сорулгалыг айтырыг. Эрткен чылын «Росчетки Сибирь Тываэнерго» ооң мурнунда ээзи чок турган шупту электри четкилериниң хандырылгазын хүлээнип ап, доктаамал ажылдыг территориалдыг четки организациязы апарган.
«А бис Республиканың Чазаа-биле кады, эргижирээнинден чаартылга негеттинип турган ол четкилерни эде кылыр комплекстиг планны ажылдап кылыр сорулганы мурнувуста салдывыс. Республика Баштыңының Айыткалында кол сорулгаларны күүседири-биле, ам-даа ажылдаар бис» – деп, Антон Лукин чугаалаан.
