“Тайга” станциязынга аныяк хаакчы Кежик Чыртак-Уругнуң 18 харлаанынга тураскааткан дугуйлуг хаакка республика чергелиг маргылдаа болуп эрткенин Таңдының спорт школазы дыңнаткан.
Кежик – хаак маргылдааларының тиилекчизи база шаңналдарлыг черлерниң эдилекчизи. Спортчунуң өг-бүлезиниң шаңналы дээш дугуйлуг хаакка республика чергелиг чарыш бедик деңнелге эрткен. Тываның хаак спортунга чалыы ынактар «Тайга» станциязынга чыглып, бедик көргүзүглерни болгаш тиилелгеже чүткүлүн көргүскеннер.
18 харга чедир оолдар аразынга бирги черде Эдуард Лахов, ийиги черде Амир Монгуш, үшкү черде Сайынбек Сарыглар. 18 харга чедир уруглар аразынга Алдын-Сай Донгак биле Кристина Куулар бирги-ийиги черлерни үлешкен. 12 харга чедир оолдар аразынга бирги черге Александр Куулар төлептиг болган.
Таңдының спорт школазы аныяк хаакчының өг-бүлезинге болгаш эрттирикчилерге республикада спортту хөгжүдеринге деткимчези дээш четтиргенин илереткен.
