Алдын-Белек Норбу – Шагаан-Арыг хоорайның 2 дугаар ортумак школазында уругларның класстан дашкаар ажыл-чорудулгазының удуртукчузу кылдыр 2013 чылдан бээр чедиишкинниг ажылдап чоруурун ТР-ниң Өөредилге яамызы дыңнаткан. Ол тыва национал хөгжүм херекселинге ойнаар, сыгыртыр, хөөмейлээр оолдарны чыып, «Дембилдей» бөлүктү тургускан.
Он чылдың дургузунда Алдын-Белек Очур-оолович беш салгалды тыва национал хөгжүм херекселинге ойнаарынга, сыгыт, хөөмей, каргыраага сонуургалын оттуруп, оларның чажыртынып чоруур уран салым-чаяанын ажыткан.
Башкының өөредип каан оолдарындан шыырак хөгжүмчүлер, ыраажылар үнүп турары өөрүнчүг. Оларның чижээнге делегей чергелиг хөй-хөй хөөмей-сыгыт мөөрейлериниң тиилекчизи, «Каргыраа» делегей шуулганының «Каргырааның хааны» аттың эдилекчизи Лопсан Мундукайны чоргаарал-биле адап болур.
«Дембилдейниң» бирги салгалының өөреникчилери Лопсан Мундукай, Чимис Донгак «Чайыр» ыры-хөгжүм бөлүүн, дөрткү салгалы Ичин-Норбу Чүлдүм, Кежик Серин олар уран чүүл колледжизинде «Хүүле» бөлүүн тургузуп, ойнап чоруурлар. Амгы бешки салгалында Норбу Мундукай, Рустам Дажы, Ай-Алдын Майгын-оол, Сайынэр Көшкендей, Даниил Куулар, Айлазат Норбу республикадан дашкаар делегей чергелиг мөөрейлерге дээди шаңналдарга каш удаа төлептиг болуп турарлар.
2013 чылдан бээр «Дембилдей» бөлүү республикада чылдың болуп эртип турар «Сарадак» хөөмей-сыгыт мөөрейинге чылдың-на дээди шаңналды ээлеп чоруур. Ол ышкаш өөреникчилерниң Москва, Чебоксары, Вологда, Бишкек хоорайларга, Шушенское суурга янзы-бүрү мөөрейлерге, фестивальдарга чедиишкинниг киржип чорууру Алдын-Белек Очур-ооловичиниң кызымакай ажыл-ижиниң түңнели болур.
Чырык черде чурттап чоруур кижи бүрүзү ук-төөгүлүг. Алдын-Белек Очур-оолович чүдүп-тейлээр ыдыктарлыг, чурумалдыг Чаа-Хөл суурга хөй ажы-төлдүг өг-бүлениң хеймери болуп төрүттүнген. Мал аразынга өскен болгаш, кара чажындан-на өшкү-хоюн кадарып, аът малды ажаап-тежээп билир. Ачазы суму чагырыкчызы болгаш өөнге орбас, аалга авазы-биле артар. Угбалары-акылары өөренип, ажылдап чорупканда, бичии Алдын-Белек авазының кол дузалакчызы турган.
Алдын-Белек Норбуга хөөмей-сыгыттың чажыттарын айтып берип, углап-баштап каан, уттундурбас чагыг-сүмезин берип чораан башкызы – Россияның алдарлыг артизи, Тываның Улустуң хөөмейжизи Коңгар-оол Ондар.
