Ак-Довурактың 3 дугаар школазында септелге ажылдарын «Депшилге» кызыгаарлаан харыысалгалыг ниитилел чорудуп турар. Тудугжулар үндезин септелге ажылдарының барык чартыындан хөй хемчээлди күүсеткен.
«Аныяктар болгаш уруглар» национал төлевилелдиң бир кезээ «Уругларга бүгү-ле экини» федералдыг төлевилел-биле дөрт каът школаның үндезин септелгезин акшаландырып турар.
ТР-ниң Өөредилге яамызының дыңнатканы-биле алырга, объектиниң техниктиг белени 56 хуу четкен. Ажылдар ооң мурнунда бадылаан график езугаар шыңгыы чоруп турар.
Амгы үеде шөлчүгеште хары угда 25 тудугжу ажылдап турар. Хүлээникчи организация иштики болгаш даштыкы ажылдар-биле чергелештир чылыдылга болгаш сантехника системазын эптээр база электри удазыннарын солуур ажылды чорудуп турар. Оран-сава иштинде ханаларны будууру дооступ турар, арыгланыр өрээлдерде чаа плиткаларны салып эгелей берген.
Объектиниң каъттарында ханаларын бүрүнү-биле дескилээр, будуур, даштын малгаштаар, чугайлаар, туттунар черлер кылыр, эжик кастактарын салыр, арыгланыр өрээлдерде чаа плиткалар салыр ажылдар чоруп турар.
Чаа өөредилге чылынга чедир өөреникчилер болгаш башкылар чаартынган таарымчалыг болгаш айыыл чок шөлдүг болзун дээш, объектиде септелге ажылдары яамының доктаамал хыналдазында.
Бо чылын чеди өөредилге объектизин, оларның аразында Ак-Довурактың даг техникумун, Тываның агроүлетпүр техникумунуң 2 дугаар ниити чуртталга бажыңын, Чеди-Хөл кожууннуң Ак-Тал суурнуң уруглар садын, Тес-Хем кожууннуң «Сайлык» лагерин эде чаартыр.
