Аныяктарны болгаш уругларны деткиир шупту хемчеглерни чаа национал төлевилелче каттыштырар

Россияның Президентизи Владимир Путинниң эгелээшкини-биле келир чылын эгелээр "Аныяктар болгаш уруглар” чаа национал төлевилел боттаныышкыны-биле регионнуң эрге-чагыргазының мурнунда сорулгаларын ТР-ниң аныяктар херээниң талазы-биле сайыды Субудай Оюн таныштырган.

– Аңгы-аңгы хар-назылыг бөлүктер-биле ажылдаан мурнакчы арга-дуржулганы быжыглаары-биле уругларны болгаш аныяктарны деткиир шупту хемчеглерни Россияның Президентизиниң эгелээни «Аныяктар болгаш уруглар» национал төлевилелче каттыштырар.

Национал төлевилелдиң шугуму-биле ол адырда аңгы-аңгы албан черлериниң ажыл-чорудулгазын дүүштүрер тос федералдыг төлевилелди боттандырар. Бо төлевилелди аңгы-аңгы назы-харлыг уругларга болгаш аныяктарга – школачылардан эгелээш, студентилерге болгаш ажылчын аныяктарга чедир үре-түңнелдиг боттандырар сорулгалыг күүсекчи эрге-чагырганың харыысалгалыг органнарының чаңгыс командазын чыгган - деп, Субудай Оюн демдеглээн.

Национал төлевилелдиң көргүзүглерин чедип алырынга Аныяктар херектериниң талазы-биле федералдыг агентилелди, ТР-ниң Аныяктар херектериниң талазы-биле яамызын харыысалгалыг органнар кылдыр, а ТР-ниң Өөредилге яамызын кады күүседир кылдыр томуйлаанын сайыт тайылбырлаан.

Албан черлери-биле кады инфраструктураны хөгжүдер, тудуг болгаш ниити өөредилге черлерин чаартыр, школадан эгелеп эртемниң, амгы үениң технологияларының адырында кадрларны белеткээр, республиканың аныяктар политиказын комплекстиг хөгжүдер, аныяк тускай мергежилдиглерни деткиир, эки турачылар ажылын сайзырадыр болгаш өске-даа хемчеглерни боттандырар.

Национал төлевилел күүселдези-биле Россияның аныяк хамаатыларынга деткимчени школазынга, колледжке азы дээди өөредилге черинге өөренип турда, күш-ажылчы баштайгы базымнарының соонда-даа, оларның бүгү назынында көргүзер. Ынчалдыр «Аныяктар болгаш уруглар» национал төлевилел аныяктар политиказын элээн делгемчидип, Россияның бүгү талалыг хөгжүлдезиниң чугула кезээ апаар.

Субудай Оюн ооң-биле чергелештир, 2030 чылга чедир төрээн чуртунда бот-сайгартынар аргаларга бүзүрээр аныяктарның үлүү 85 хуу чедер ужурлуун демдеглээн. Ону чедип алырда, аныяктарга грант деткимчезин көргүзер. Тывага ажыттынар грант дөзевилээриниң школазы “Аныяктар болгаш уруглар” национал төлевилелдиң көргүзүглерин чедип алыр хемчеглерни боттандырар ол план-биле ажылдаар. Школаның тускай мергежилдиглери республиканың аныяктарынга боттарының идеяларын төлевилелдер кылдыр “хаптаарынга” база ол дээш грант деткимчезин алырынга өөредир.

Тываның «Кады бис» регионалдыг штавының удуртукчузу Артыш Монгуш база "Тываның энерелдиг чүректери" командазы аныяктар ортузунга эки турачылар шимчээшкинин чорударынга чедиишкинниг арга-дуржулгазын көргүскен үре-түңнелдиг ажылының ачызында бистиң республика бүгү Россияда эки ажылдыг штабтар даңзызының үшкү одуруун ээлеп турарын сайыт демдеглээн.