Тыва Республиканың күрүне тугунуң байырлалы Арат шөлүнге Россияның болгаш Тываның күрүне туктарын көдүрер езулал-биле эгелээн.
Тываның Баштыңы Владислав Ховалыг, Чазак кежигүннери, Дээди Хуралдың депутаттары, корум-чурум камгалаар органнарның, республиканың шериг кезектериниң удуртукчулары, яамылар болгаш албан черлер төлээлери байырлыг езулалга киришкен.
«Бистиң үш өңнүг сүлде демдээвис тыва чоннуң чаңгыс деминиң байлак төөгүзүн болгаш онзагай культуразын илередип турар. Туктуң адаа-биле республика экономиканы, культураны болгаш социал адырны хөгжүдүп, бүзүрелдии-биле бурунгаарлап бар чоруур» – деп, Владислав Ховалыг бодунуң албан езузунуң блогунда бижээн.
Тываның күрүне тугунуң хүнүн 2023 чылдан бээр сентябрь 17-де демдеглеп эрттирип турар. Үжен дөрт чыл бурунгаар, таптыг-ла ол хүнде, республиканың Дээди Соведи Тываның күрүне тугунуң амгы хевирин бадылаан.
Үш чыл бурунгаар «Тываның энерелдиг чүректери» аныяктарның хөй-ниити шимчээшкининиң идепкейжилериниң Тыва Республиканың тугунуң хүнүн тургузар дугайында дилээн Тываның Баштыңы Владислав Ховалыг деткип, Күрүне тугунуң хүнүн сентябрь 17-де кылдыр тургускан.
Бо байырлал Тываның чонунуң сүлде-сүзүү бедииринге, төрээн чуртунга ынак болгаш хүндүткелдиг болурунга, ооң төөгүзүн билип алырынга, аныяк салгалды ада-чуртчу сеткил-хөөннүг, улуг салгалгалдарның үүле-херектеринге төлептиг кылдыр кижизидип өстүреринге салдарлыг.
