Улуг-Хем кожууннуң Арыскан – Арыг-Үзүү аразында чазаглыг орукта чеди-сес-даа көвүрүг бар. Оларның ийизи шору улуг көвүрүглер. Хүүле хемни кежир көвүрүгнү бо чылын ажыглалче киирген.
Арыскан суурнуң чанында кара-сугну кежир улуг көвүрүг эргижирээш, адаа ирип, бир талазы шуут чирли берген болгаш чурттакчы чонга аргыжарынга айыылды тургузуп турган.
«Алдын» кызыгаарлаттынган харыысалгалыг ниитилелдиң (директору Артыш Лопсан) тудугжулары ук көвүрүгнү бускаш, чорумалдар аргыжар кылдыр түр када кежигни кылган.
Чаа көвүрүгнүң дооразы 7 метр, узуну 32 метр болур. Ооң тудуунда алды кижи хаара туттунган. Оларның ийизи тус черниң чурттакчылары. Тудуг материалдарының 70 хуузу келген.
Чаа ыяш көвүрүг быжыг болзун дээш, ооң адаан демир-бетон-биле кылып турар. Ук объектини федералдыг бюджеттен акшаландырып турар, ниити түңү 50 сая рубль. Көвүрүгнү август айда ажыглалче киирери планнаттынган.
Эки шынарлыг болгаш быжыг көвүрүг арысканчыларга биеэги дег орук-чирикке шаптараазын чок аргыжар байдалды тургузар.
