Бөгүн Мөңгүн-Тайга кожууннуң Мөген-Бүренде «Арзайты» көдээ ажыл-агыйының хереглел кооперативинде мал согар биче цех ажыттынган. Ында какпактаан сарлык болгаш хой эъди, хеңмеден аңгыда чоокта чаа консервалаан кадыргыны бүдүрүп эгелээн.
Ук бүдүрүлгениң даргазы Зурав Эрексен цехтиң ажылын таныштырган. Ында ниитизи-биле он бир ажылдакчы бар. Бүдүрүлгениң хүнде күчүзү – бир ээлчегде 20 баш бода база 50 баш шээр мал. Болбаазырадыр балыкты Хиндиктиг-Хөл болгаш Тоолайты хөлден тудуп турар.
– Балыктың казырыын болгаш иштин аштап чуггаш, бажын, кудуруун база чакпаларын адырып кааптар. Улаштыр лаазага согуна, перец, лавр бүрүзүн дузааш, болбаазырадып турар бис – деп, цехтиң ажылдакчызы Аржаана Иргит дыңнаткан.
Цех какпактаан сарлык болгаш хой эъдинден аңгыда кырлыг-кара, арбай холаан хевирлерин база бүдүрүп турарын сагындыраал.
