Республиканың көдээ ажыл-агый бараан бүдүрүкчүлериниң делгелге-ярмарказынга «Аржаан» көдээ ажыл-агый хереглел кооперативиниң ажылдакчыларының кедип алган чаңгыс аай хеви тулган болган. ТР-ниң Көдээ ажыл-агый болгаш аъш-чем яамызы кооперативтиң удуртукчузу Нэлли Чамзыга диплом болгаш 10 000 акшаның сертификадын тывыскан.
Бии-Хем кожуундан Нэлли Чамзы «Аржаан» көдээ ажыл-агый хереглел кооперативин 2006 чылда школага башкылап тургаш-ла ажыткан. Өг-бүлениң агробизнести ажыдар дугайында бодалы анаа-ла төрүттүнүп келбээн: боттарның хуу малының баш санының өскени-биле сүт продукциязын болбаазырадып садары – ажыл-ижиниң негелдези апарган.
2014 чылдың төнчүзүнде Чамзының өг-бүлези «Чаңгыс суур – чаңгыс бүдүрүлге» төлевилелиниң комиссиязынга бизнес-төлевилелин камгалааш, бир ээлчегде муң литр сүт болбаазырадыр күчүлүг цехти тударынга күрүне деткимчезин алган.
Сүт болбаазырадыр цехте сүттү хүлээп алыр, арыглаар, соодар, изидер, хайындырар, тырттар, кудар, савалаар болгаш шыгжаар технология шугуму бар. Цехтиң сүт дериг-херекселдерин, иштики болгаш даштыкы ажылдарын аъш-чем адырынга чөпшээрээн амгы үениң материалдары-биле кылган.
«Аржаан» көдээ ажыл-агый кооперативи сүт, хойтпак, өреме, ээжегей, ак саржаг база йогуртту Кызылдың көдээ ажыл-агый рыногунда база аъш-чем садыгларында дужаап, чоннуң хереглелин ханыдырып турар.
Аржаанчылар сумузунуң сүт болбаазырадыр цегинче артыкшылдыг сүдүн дужаап, акша-төгерикти ажылдап ап турарлар.
Көдээ ажыл-агый бараан бүдүрүкчүлериниң делгелгезинге шупту кожууннардан 104 көдээ ажыл-агый бүдүрүкчүлери киришкенин сагындыраал.
