Бии-Хем кожууннуң Аржаан сумузундан «Чаа сорук» төлевилелиниң 2021 чылдың киржикчизи Орлан Доржукай эрткен күзүн долу эвес мөөңнээшкин езугаар шериг албан-хүлээлгезин күүседири-биле кыйгыртканын чагырга чериниң даргазы Екатерина Тулуш дыңнаткан. Ол амгы үеде Тываның эрес-дидим оолдары-биле кады Ада-чуртун камгалап турар.
Малчын өг-бүлени Орлан Доржукайның кады төрээн акызы, төрел аймаа, Аржаан суму чагырга чериниң удуртулгазы, культура ажылдакчылары деткип, ачы-дузазын доктаамал көргүзүп турар.
Малчыннарның эң-не чыштыг үези – мал оолдаашкыны эгелээн. Эрткен чылын «чаа сорукчулар» чээрби баш инээнге онааштыр ол-ла хире бызааны онча-менди камгалап алган. Бо хүнде өдээнде алды бызаа бар.
Доржукайлар мал чемин четчир кылдыр белеткеп алган болгаш кыштаглаашкын чүгээр байдалга эрткен. Немелде мал чеми – сула курлавырда бар. Сумунуң мал эмчизи Аяна Мурзукай малдың деңгелин доктаамал хынап, план езугаар халдавырлыг аарыгларга удур тарылганы салып турар.
Хөртүктей хадып каапкан хар малчыннарның аргыжарынга, мал оъткарарынга шаптараазыннарны тургузуп турган. Сумунуң чагырга чериниң удуртулгазының база «Аржаан» көдээ ажыл-агый хереглел кооперативиниң удуртукчузу Нелли Чамзының деткимчези-биле чаңгыс эвес удаа далбый тыртып, орук болгаш мал одарын аштап арыглаан.
Төлевилелдиң киржикчилери ийи ажы-төлдүг. Ада-иезиниң солуттунмас дузалакчылары – Начын алдыгы классчы, Онзагай үшкү классчы. Өгнүң кыс ээзи Сюзана Доржукай сумунуң фельдшер-акушер пунктузунда ажылдап турар.
Доржукайларның өг-бүлези, дөргүл-төрели болгаш аржаанчылар дайынчы хөделиишкиннер девискээринде шериг албан-хүлээлгезин күүседип турар маадыр чаңгыс чер-чурттуун тиилелгелиг, бүдүн-бүрүн чанып келирин манап турарлар.
