Ыдыктыг Сака Дава айында Бии-Хем кожууннуң Аржаан сумузунуң чурттакчылары сумузунче кирер оруктуң аксында субурганны чугайлап, демир херимин будуп, девискээрин чаагайжыдып, аштап арыглаан.
Ыдыктыг Субурган сумуну болгаш чурттакчы чонну хай-бачыт, аарыг-аржык болгаш өске-даа кара күштерден камгалап турар дээрзинге аржаанчылар бүзүрээр.
Чоокта чаа аржаанчылар боттарының күжү-биле «Бора даа» деп ыдыктыг черге дыштаныр черни кылып алганнар. Буянныг үүлеге киришкен шевер оолдарга, Аржаанның ортумак школазының, уруглар садының, көдээ культура бажыңының болгаш Тарлаг суму чагырга чериниң коллективтеринге, «Энелер» хоочуннар чөвүлелиниң кежигүннеринге деткимчени көргүскени дээш, Аржаан суму чагыргазының удуртулгазы өөрүп четтиргенин илереткен.
Ол ышкаш Аржаан сумузунуң чурттакчылары «Бистиң сумувус – арыг-силигниң девискээри» деп кыйгырыг-биле неделя санында санитарлыг арыглаашкынны чорудуп турар. Олар хөй-ниити чыглыр черлерни болгаш бажыңнар чанының участоктарын демнии-биле аштап арыглап, сумузунуң адрезин чаартып, чаагайжыткан.
Суму чагыргазының удуртулгазы чаңгыс чер-чурттугларын бажыңнар чанын арыг-шеверге тударынче кыйгырган.
