Бии-Хем кожууннуң Аржаан сумузунда болгаш Чкаловка арбанында угарлыг ыштан хораннаныышкынга удур профилактика ажылдарын күштелдирип, «Оваарымчалыг, угарлыг газ» деп акцияны уламчылап турарын чагырга чери дыңнаткан.
Суму чагыргазы биле өрт кезээниң ажылдакчылары ада-ие болгаш ниити хуралдарга угарлыг ыштың айыылының база хораннанган таварылгада бирги дузаны канчаар көргүзерин тайылбырлап, чугааны чорудуп, бажың ээлеринге сагындырыг бижиктерни үлеп, печкаларның болгаш хоолайларның, өрт медээчилериниң байдалын хынаан. Ол ышкаш хөй ажы-төлдүг өг-бүлелерге ук херекселди салган.
Угарлыг газ болза, кыпкан чүүлдүң эң хоралыг артынчызы-дыр, ол аар ужуктарга, өлүмге безин чедирип болур.
Тываның БаштыңыВладислав Ховалыг хуу секторда бажыңнарже профилактиктиг рейд үезинде одаар печкалар база хоолайларже онза кичээнгейни салыр даалганы бергенин сагындыраал.
