“Көдээ черлерниң комплекстиг хөгжүлдези” күрүне программаның «Көдээ девискээрлерни чаагайжыдары» федералдыг төлевилелдиң чорудуу-биле Бии-Хем кожууннуң Аржаан сумузунда хөй-ниитиниң дыштанылга шөлчүгежиниң тудуу дооступ турарын чагырга чериниң даргазы Екатерина Тулуш дыңнаткан.
Тудуг ажылдарын хууда сайгарлыкчы Акоп Багянның демниг командазы чорудуп турар. Бо хүнде шөлдүң девискээринде брусчатканы эптеп, чаткан, «Аржаанга ынак мен» деп стеланы тургускан, чечек тарыыр девискээрни кылырын дооскан. Ам дыштанып олурар сандайларны тургузар болгаш чырык кожар ажылдар арткан.
Чагырга чериниң болгаш культура ажылдакчылары тудугжуларга дузалажып, шөлчүгештиң девискээрин аштап арыглап турарлар.
“Көдээ черлерниң комплекстиг хөгжүлдези” күрүне программазын Чурттуң Президентизиниң даалгазы езугаар ажылдап кылган болгаш амыдыралда боттандырып турарын сагындыраал.
