Бии-Хем кожууннуң Аржаан сумузунуң девискээринде кыштаглаашкын чогумчалыг эртип турарын чагырга чериниң даргазы Екатерина Тулуш дыңнаткан.
Чаларап келген чылда чагырга чериниң ажылдакчылары малды чылдың дөрт эргилдезинде, дыштаныр шөлээ чок кадарып турар көдээ ишчилерге байырын чедирип, үнүүшкүннерни чоруткан.
– Өгбелеринден салгал дамчаан ажыл-ижин уламчылап турар суурнуң аныяк малчыннарының өдээнде шээр болгаш бода малының баш саны чылдан чылче өзүп турары өөрунчүг.
Малчыннарывыс мал оолдаашкынынга ыяк белеткенип алган. Мал эмчилери көдээ ишчилер-биле харылзааны доктаамал тудуп, оларның аалдарынга чедип турар.
Долу эвес мөөңнээшкин езугаар кыйгырткан «Чаа сорук» төлевилелиниң 2020-2021 чылдың киржикчилери Тываның эрес-дидим оолдары-биле төрээн чуртун төлептии-биле камгалап турарлар. Өгнүң кыс ээлеринге кады төрээнери дузалажып, малын карактажып турар. Кышты хүр ажар дээш сиген-ширбиилин, немелде мал чеминиң курлавырын четчир кылдыр белеткеп алганнар.
Сумуда 1200 ажыг бода, 2300 ажыг шээр, 700 ажыг чылгы мал бар – деп, Екатерина Тулуш чугаалааш, республиканың көдээ ишчилеринге кышты хүр ажып, малын онча-менди камгалап алырын күзээн.
Хөртүктей хадып каапкан хар малчыннарның аргыжарынга, мал оъткарарынга шаптараазыннарны тургузуп турган. Сумунуң чагырга чериниң удуртулгазының база «Аржаан» көдээ ажыл-агый хереглел кооперативиниң удуртукчузу Нелли Чамзының, хөй ажы-төлдүг ада Шолбан Конгар, Бии-Хем кожууннуң депутады Анган Тюлюш оларның деткимчези-биле чаңгыс эвес удаа далбый тыртып, орук болгаш мал одарын аштап арыглап турар.
