Бии-Хем кожууннуң Аржаан сумузунуң девискээринде болгаш Чкаловка арбанында кыштаглаашкын хүр-менди эртип турарын чагырга чери дыңнаткан.
Чаларап келген чылдың дыштаныр хүннеринде чагырга чериниң ажылдакчылары малчын коданнарны эргий кезип, үнүүшкүннерни чоруткан.
– Кыштагларже оруктар ажык, мал чеминиң курлавыры четчир болгаш мал-маганының деңгели эки.
Малчыннарывыс кыштаглаашкынга, мал оолдаашкынынга ыяк белеткенип алган. Мал эмчилери көдээ ишчилер-биле харылзааны доктаамал тудуп, оларның аалдарынга чедип турар.
Өгбелерден салгал дамчаан ажыл-ижин уламчылап турар малчыннарывыстың өдээнде шээр болгаш бода малының баш саны чылдан чылче өзүп турары өөрунчүг – деп, сумунуң чагырга даргазы Екатерина Тулуш медеглээн.
