Бии-Хем кожууннуң Аржаанга «Мээң төрээн суурум – Аржаан» деп кожууннуң шилиндек эр командаларының аразынга хол бөмбүүнүң маргылдаазы болуп эрткен.
Маргылдаага 13 команда киришкен. Хол бөмбүкчүлери сумунуң ийи аңгы спорт залынга ойнаан. Чидиг демиселдиң түңнелинде, Аржаан сумузунуң командазы бирги черге төлептиг болган. Ийиги черни Тарлагның, үшкү черни Сесерлигниң командалары тус-тузунда чаалап алганнар.
Шаңналдыг черлер алган командаларны кубоктар, медальдар, акша шаңналдары болгаш «изиг ханнар-биле» шаңнаан. Маргылдаа үезинде чараш оюнну көргүскен мергежилдиг спортчуларга тускай шаңналдарны база тывыскан.
“Эң дээре камгалакчы” деп атка тускай шериг операциязының хоочуну Айдыс Тюлюш төлептиг болган. "Эң дээре халдакчы" – Аңгыр Хертек. Бии- Хемниң шыырак дээн универсал спортчуларының бирээзи – Менги Соскал.
Аржаан суму чагыргазының удуртулгазы маргылдааны бедик деңнелге эрттирген сумунуң хол бөмбүкчүлеринге, Бии-Хемниң хол бөмбүүнүң федерация даргазы Мерген Ховалыгга, Дээди Хуралдың депутады Аяна Монгушка, хууда сайгарлыкчылар – Омак Ойдупка, Буян Байкарага, тускай шериг операциязының киржикчилери – Родион Биче-оолга, Ай-Хаан Монгушка болгаш хөй санныг деткикчилерге четтиргенин илереткен.
Дараазында эртер маргылдааны Хадын сумузунуң төлээлери хүлээнип алганнар.
