Бии-Хем кожууннуң Аржаан сумузундан үш ажы-төлдүг Борис биле Алуна Сүрүнчүктерниң өг-бүлези өгбелеринден салгал дамчаан ажыл-ижин уламчылап турар. Аныяк малчыннар “Кыштаг” төлевилелдиӊ 2018 чылдың киржикчилери.
Сүрүнчүктерниң өг-бүлези “Чылдың өг-бүлези” бүгү-российжи мөөрейниң регионалдыг чадазының тиилекчилериниң санынче кирген. Олар “Көдээде өг-бүле” шаңналга төлептиг болган.
– Аныяк малчыннар Аржаан сумузундан ырак эвесте Кош-Даг деп черде кыштаан тудуп алгаш, чымыштыг ишче шымнып кирипкеннер. Өдээнде мал-маганының саны өзүп, немешкен. Амгы үеде олар көктүг-шыктыг Көшпей деп черде чайлаглап турар.
Өгнүң эр ээзи мал эмчизи, кыс ээзи банк ажылдакчызы болгаш башкы эртемниг. Улуг уруу Эргедеха ада-иезин тергиин эки өөредилгези-биле өөртүп турар. Ортун оглу Дадар-оол хүрежиринге сонуургалыг. Хеймер кызы Марсабель уруглар сады барып турар. Олар ада-иезиниң солуттунмас дузалакчылары.
“Буянныг өгге чон чыглыр, будуктуг ыяшка куш чыглыр” дээр болгай. Ажыл-ишчи аныяк малчыннарның аалында төрел аймаа, аалчылары черле үзүлбес – деп, Аржаан сумузунуң чагырга чериниң даргазы даргазы Екатерина Тулуш көдээ ишчилерни таныштырды.
Эрес-кежээ өг-бүле суурда бажыңының девискээринге ногаа болгаш картофель аймаан тарып алыр чаңчылдыг.
Сүрүнчүктер сумунуң хөй-ниитижилериниң санында. Олар суму, кожуун, республика чергелиг мөөрейлерниң доктаамал киржикчилери, шаңналдыг черлерниң эдилекчилери.
