Бай-Тайга кожууннуң Тээли сумузунда Н. Өлзей-оол аттыг культура бажыңынга «Аваларга болгаш адаларга мөгейиг» деп онзагай хемчег болуп эрткенин чагырга чери дыңнаткан.
Хемчегниң эгезинде кожуунда үлегерлиг ада, кырган-ача Сергей Салчак “Эр кижиниң ат-алдарының дүрүмүн”, “Тываның иелериниң ыдыктыг сагылгаларын” үлегерлиг ава, кырган-ава Сайлык Уртунай олар номчаан соонда, культура одааның ажылдакчыларының, уругларның Дамба Хүреш-оол аттыг уран чүүл школазының коллективи база хоочуннарның "Мөнге сайзанак" бөлүү солун программалыг концертин чыылганнарга бараалгаткан.
Бай-Тайга кожууннуң чагырга даргазының социал-политика талазы-биле оралакчызы Аяна Сарыглар база херээжен чоннуң болгаш хөй-ниити ажылдарының специализи Марина Салчак олар чыылганнарга байыр чедиргеш, үлегерлиг аваларга болгаш адаларга тускай шаңналдарны тывыскан.
Күш-ажыл болгаш социал политика эргелелиниң даргазы Союман Суглай-оол хөй ажы-төлдүг чамдык иелерге «Хөй ажы-төлдүг ава, ада» деп шынзылга бижиктерни тывыскаш, кандыг авалар, адалар ону ап болурун база каяа кылдыртып алырының дугайында дыңнадыышкынны берген.
Культура төвүнүң фойезинге амданныг дузаан ногаа аймаан, эм оъттарны, янзы-бүрү кат-чимистен вареньелерни болгаш оон-даа өске тыва аъш-чемни делгээн.
