Бии-Хем кожууннуң «Энерелдиг сеткилдиң оруу» ачы-дуза фондузу херээженнер чөвүлели-биле кады Бүгү делегейниң херээженнер хүнүнге уткуштур «Аваларга чечектер» деп солун хемчегни эрттирген.
Бии-Хемден тускай дайынчы хөделиишкиннерде киржип турар чаңгыс чер-чурттугларының өөнүң ишти болгаш аваларын хүндүткеп байырлаан кежээге Туранның Марк Оюн аттыг культура болгаш дыштанылга төвүнүң ажылдакчылары болгаш бичии сылдысчыгаштары концертти бараалгаткан. Психолог Ю.П. Доронина психологтуг тренингини эрттирген.
Кожууннуң төп ном саңының эки турачылары хемчегге байырланчыг хөөн киирери-биле зал иштин шимеп, каастаарынга дузалашкан.
Аваларга тураскааткан хемчегниң деткикчилери – херээженнер чөвүлелиниң кежигүннери Е. Н. Байкарага, С.Н. Ховалыгга, Ш.С. Монгушка «Энерелдиг сеткилдиң оруу» ачы-дуза фондузунуң директору Наталья Ондар четтиргенин илереткен.
