Мал чемин кайы хире курлавырлап алырындан мал-маганның кышты хүр ажары хамааржыр.
Бии-Хемниң тараачын арат ажыл-агыйының баштыңы В.К. Нурсат бо хүнде 200 тонна ажыг мал чемин белеткеп алган. Ажыл-агыйда сиген кезер, бөлер, тырылдыр дүрүп чыыр дээш өске-даа техника бар.
Кожууннуң чагырга чериниң даргазы Владимир Байыр-оол сиген белеткелин хынап көрген. Ол эрткен чылга деңнээрге, бо чылын оът-сигенниң үнгени таары болганыны-биле мал чеминиң белеткелинче улуг кичээнгейни угландырары чугула дээрзин демдеглээн.
Шөлдерде сиген дүрүглери каракка көзүлдүр-ле көвүдеп эгелээн. Мал чемин четчири-биле белеткеп алыр дээш, аяс-кааң хүн бүрүзүнде сигенчилер кызымак ажылдап турар.
