2024-2025 өөредилге чылы «Төлевилел 21» деп төлевилелди боттандырарының түңнел чылында, Тыва Республиканың Өөредилге яамызының Национал школа хөгжүдер институдунуң улуг методизи Регина Монгуш Кызылдың 9 дугаар гимназиязынга 4-кү классчыларга ужуражып, литературлуг номчулга, тыва дыл, математика болгаш хүрээлел эртемнерин төрээн (тыва) дылынга билирин хынап кичээлдерни эрттиришкенин институт
дыңнаткан.
Ук чижек-хыналданың түңнелинде башкының таварышканы дөрткү класстың өөреникчилери төрээн (тыва) дылын билир, аас-биле болгаш бижимел хевирге боттарының бодалдарын илередип турары илерээн.
Дөрт «б» класстың удуртукчузу Светлана Монгуш төлевилелди уламчылаары чугула дээрзин саналдаан, чүге дээрге ооң мурнунда математика болгаш хүрээлел эртемнерин орус дылга өөредип турганынга деңнээрге, уругларның ол эртемнерни шиңгээдип алырындан аңгыда, төрээн дылынга чугаалаары шынар талазы-биле эки түңнелдерлиг дээрзи илереттинген.
Кандыг-даа чоннуң дылы – ооң культура болгаш сагыш-сеткил өнчү-салгалын кадагалаарының болгаш сайзырадырының эң дээштиг чепсээ. А ол чепсек шынарлыг болгаш дээштиг болуру-биле ажы-төлдү төрээн дылынга өөредири бирги чергениң айтырыы.
