Шагаан-Арыг хоорайда Азия төвүнүң көшкүн чонунуң парыгын тудар ажылдар уламчылар турарын Улуг-Хем кожууннуң чагырга чериниң даргазы Буян Балбак дыңнаткан.
Эрткен Тамбов хоорайга эрткен “Чуртталга хүрээлели: бодунуң бажыңы” бүгү-российжи шуулган үезинде, биче хоорайларда база төөгүлүг суурларда таарымчалыг хоорай хүрээлелин тургузар талазы-биле эки дирткен төлевилелдер мөөрейинге бо парктың төлевилели тиилээн.
Шагаан-арыгжылар боттарының чогаадыкчы бодалын боттандырарынга 70 ажыг сая рубльдиң күрүне деткимчези көрдүнген.
Сүбедей маадырның тураскаалын тургускан Бай-Даг дааның эдээнде паркка тыва өглер девискээри, спортчу болгаш уруглар ойнаар, бадылажылга езулалының, аңгы-аңгы хемчеглер эрттирер шөлдер, дыштанылга девискээрлерин, амфитеатрны кылыр.
Улуг-Хем кожууннуң кол архитектору Карина Комбуй төлевилелди чогааткан, «Авангард» КХН-ниң архитектору Алдынай Байкара дөзевилелин шыйып чураан.
Эрткен чылын Нижний Новгородка эрткен шак-ла ындыг мөөрейге Тываның төлевилели база тиилээнин сагындыраал. “Чурттаар чер болгаш хоорай хүрээлели” национал төлевилелдиң күрүне субсидиязының акшазы-биле Бии-Хем кожуунунуң төвүнге көжүп келген баштайгы орус чонга паркты Туран хоорайда туткан.
