Бай-Тайга кожууннуң база бир маадыры болгаш чоргааралы, Кызылда 55-ки гвардейжи тускай мото-адыгжы (даг) бригаданың улуг сержантызы Азият Кужугет чаңгыс чер чурттуглары-биле ужурашканын чагырга чери дыңнаткан.
Азият Кужугет Россия Федерациязының Президентизи, кол командылакчы Владимир Путинниң бодундан дайынчы ачы-хавыяазы дээш шаңнал чепсекти болгаш күрүне баштыңының штандарт тускай демдээн алганын сагындыраал.
Улуг сержант тускай шериг операциязының баштайгы хүннеринден тура ында киржип турар. Ол “Эрес-дидим чоруу дээш” болгаш “Дайынчы шылгарал дээш” деп хөрек демдектериниң эдилекчизи.
Бай-Тайга кожууннуң чагырга даргазының хүлээлгезин күүседип турар Аржан Хертек аалчыны ак кадак-биле уткуп алган соонда, ужуражылганы эрттирген.
– Бистиң эрес-дидим тыва оолдарывыстың аразындан Россияның Президентизи В.В. Путинниң холундан улуг шаңнал алыры дээрге чаңгыс чер чурттугларынга, биске улуг чоргаарал-дыр. Маадырывыска моон-даа соңгаар ак орукту күзеп, сүлдези бедик болурун йөрээп тур бис. Ол ышкаш ооң авазы Клара Александровнага эрес маадырны чаяап, кижизиткенинге өөрүп четтирдивис – деп, Аржан Хертек байырын чедирген.
Улуг сержант В.Б. Кара-Сал аттыг Тээлиниң ниити билиг ортумак школазының өөреникчилери-биле база ужурашкан. Кожууннуң Николай Өлзей-оол аттыг культура бажыңының коллективи Азият Кужугеттиң хей-аъдын көдүрүп, аңаа төрээн чер-чуртунуң дугайында чараш ырыларын күүсеткен.
