2022 чылда бөрү бажын узуткааны дээш Тываның аңчыларынга ийи сая ажыг рубльди төлээн. ТР-ниң дириг амытаннар делегейиниң объектилерин камгалаар күрүне комитеди республиканың мал ажыл-агыйларынга улуг каражаны чедирип турар кокай санын өйлээр кампанияның түңнелдерин дыңнаткан.
Албан чериниң дыңнатканы болза, эрткен чылын аңчылар 290 баш бөрүнү узуткаан, улуг бир бөрү дээш сес муң, бөрзээ дээш дөрт муң рубльдиң шаңнал акшазын алган.
Мөңгүн-Тайга, Улуг-Хем база Тожу кожууннарның аңчылары эң хөй кокайны узуткап, тергииннерниң санынче киргенин, республиканың аңныыр чериниң тускай мергежилдиглери демдеглээн. Бөрү аглаашкынынче 500 ажыг аңчылар үнүп, 93 бригаданы тургускан.
Аңчылар чедиишкинниг болзажок, кокайлар саны эвээжевээн. Ол черлик араатанның дүрген өзүп-көвүдээринде-даа эвес, а кышкы үеде кожа регионнардан, чижээ, Моолдан хөй кокайларның кирип келири-биле ол тайылбырлаттынар. Сөөлгү каш чылдарда республика девискээринде кокайлар саны 1300-1500 башта доктаамал туруп, чогуур санындан ийи катап көвүдээн.
Араатаннарның халдаашкынындан Тываның малчыннары когарап, чылда-ла муң-муң баш мал-маганны ышкынып турар. Республиканың көдээ ажыл-агыйынга чыл санында-ла 40-ден 70 сая рубльдиң каражазын чедирип турар.
ТР-ниң Көдээ ажыл-агый яамызының санааны-биле алырга, 15 чыл дургузунда когаралдың түңү барык бир млрд рубль четкен. Ынчангаш республиканың эрге-чагыргазы бөрү аглааны дээш төлевирлерни ам-даа төлээр.
2023 чылда ооң хемчээли – улуг кокайга сес муң, ооң бөрзээнге дөрт муң рубль кылдыр арткан.
Микрорайон Восток Кызыла на перепутье: За или против автозаправочной станции рядом с домами
В Кызыле состоялись публичные слушания по вопросам градостроительной деятельности.