Бөгүн Тываның хууда сайгарлыкчылары, артык кезектер садыгларының ээлери болгаш республиканың кеш болгаш шээр аарыглар диспансери тускай шериг операциязының киржикчилеринге ээлчеглиг ачы-дузазын дамчыткан.
“ТываАгротех” кызыгаарлаан харыысалгалыг ниитилелдиң төлээзи Виктор Евдокимов дайынчы даалгалар күүседип турар оолдарны шыдаар шаа-биле деткип турарын дыңнаткан. “Бо удаада автомашиналар хандырылгазынга ажыглаар херекселдерни (домкрат, дүлгүүрлер дээш оон-даа өске) дамчыдып тур бис. Тускай шериг операциязында мурнуку одуругда тулчуп турар дайынчыларга, чээним Валерийге, өөрлеривис Айдың биле Мергенге амыр-менди чанып кээрин күзедивис” – деп, ол чугаалаан.
Республиканың кеш болгаш шээр аарыглар диспансериниң кол эмчизиниң оралакчызы Май-оол Сат электрилиг генератор, бензин-биле ажылдаар хирээни, машина-техника септээр херекселдерни, эм-таңны дамчыткан. Диспансерниң коллективи ай санында акша-төгерикти чыггаш, дайынчы оолдарның чагыын езугаар херек чүүлдерни саткаш, ачы-дуза чыыр пунктуже хүлээдип турарын оралакчы эмчи дыңнаткан.
Хууда сайгарлыкчылар Сергей Ооржак аар чүък техника көдүрер херекселди, Ирина Лифанова «Ужар» деп дайынчы кыйгы аттыг чаңгыс чер чурттуунуң чагыын күүседип, ужудукчу чок системалар илередир “Булат 3mx” деп маркалыг херекселди хүлээткен.
Ниити-российжи улусчу фронтунуң Тывада салбырының күүсекчи комитединиң удуртукчузу Саима Далчинниң дыңнатканы-биле алырга, ук техниктиг херексел дайынчылар аразында улуг хереглелдиг. Олар ооң дузазы-биле дайзынның «кушкаштары» кайы хире ыракта ужуп кел чоруурун тодарадыптар аргалыг.
Ачы-дуза чыылдазы апрель 28-ке чедир уламчылаар. Тускай шериг операциязында киржип турар дайынчыларга ачы-дуза чыыр пункт дараазында адресте ажылдап турар: Кызыл хоорай, Тыва эки турачылар кудумчузу, 3. Харылзажыр телефону: 2-10-50.
