Бөгүн Тыва Республиканың шериг комиссариады, Сүт-Хөл, Бий-Хем болгаш Каа-Хем кожууннарының чурттакчы чону тускай шериг операциязында киржип турар дайынчыларга дузаламчыны дамчыткан.
Кожууннарның төлээлери бода, чылгы болгаш шээр малдың доңурган эъдин, генераторларны, чынныр херекселдерни, агаар үрдүрүкчүлерин, чылыг хепти, эм-таңны, бензин-биле ажылдаар хирээлерни, чажыртынып шыптынар четкилерни дээш дайынчыларга оон-даа өске херек чүүлдерни эккелген.
Тыва Республиканың шериг комиссариадының төлээзи Айдыс Сундуйнуң чугаазы-биле алырга, шериг чери бо удаада Курск болгаш Ростовта дайынчыларже посылкаларны чыгган. «Посылка бүрүзүнде чигирзиг чемни, шайны, республиканың аңгы-аңгы булуңнарындан уругларның чагааларын, «Тувинская правда» биле «Шын солуннарын суп каан бис. Шериг оолдарывыс кежээлерде одаг кыдыынга изиг шайын аартап ора, төрээн черинден чоруткан конфет, шоколадтарны чооглаарлар. Декбарь 15-ке чедир ханалар чылыглар чүүлдерни немей эккээр бис. Бистиң профэвилелде кежигүннерниң саны эвээш-даа болза, 2022 чылдан тура ачы-дуза чыылдазында доктаамал киржип турар бис» – деп, ол чугаалаан.
Сүт-хөлчүлер тускай шериг операциязы эгелээнинден тура дайынчыларга доктаамал ачы-дузазын чедирип турар. «Бөгүн бистиң кожууннуң чонунуң мурнундан доңурган бода, чылгы болгаш шээр мал эъдин, техниктиг болгаш чынныр херекселдерни, чылыг хепти, конфет-чигирни, боорзактарны, чажыртынар четкилерни дээш оон-даа өске херек чүүлдерни дамчыттывыс. Ам дараазында ачы-дуза чыылдазынче белеткенип кириптивис» – деп, Сүт-Хөл кожууннуң чагырга даргазының социал-политика талазы-биле оралакчызы Диана Ондар дыңнаткан.
Бий-Хемден эки турачы Мерген Шивит-оол чаңгыс чер чурттуглары дайынчыларның чагыын езугаар ачы-дуза чүъгүн чыгганын дыңнадып, шериг оолдар онча-менди тиилелгелиг чанып кээрин күзээн.
Каа-Хем кожууннуң чурттакчыларындан чүъктү кожууннуң чагырга даргазы Станислав Киштеек дамчыткан.
Ачы-дуза чыылдазы декабрь 15-ке чедир уламчылаар. Эртенинде ийи чүък автомашиназы ийи аңгы угланыышкынче (Курск болгаш Донецк) чүъктү чедирери-биле үнүптер.
«Улусчу фронт. Бүгү чүүлдү тиилелгеже!» төлевилелдиң чорудуу-биле дайынчы хөделиишкиннер девискээринде шериглерге Чаа чыл бүдүүзүнде чедирер ачы-дуза чыылдазын Тываның Чазааның деткимчези-биле чорудуп турар.
