Тывада «Улусчу фронт. Бүгү чүүлдү тиилелгеже!» төлевилелдиң чорудуу-биле Тывадан тускай шериг операциязында киржип турар дайынчыларга база хостаттырган девискээрлерде тайбың чурттакчыларны деткиир ачы-дуза чыыр кампания уламчылап турар.
Бөгүн Азербайджан диаспораның төлээзи Заман Гаджиев «Тайгинский» деп дайынчы кыйгы аттыг эжиниң чагыын күүседип, бодунуң өмүнээзинден ужудукчу чок аппаратты хүлээткен. Ол дайынчы хөделиишкиннер девискээринде тулчуп турар эжи-биле доктаамал харылзаада.
Кызыл кожууннуң Элегес-Аксының эки турачылары өскелерден чыда калбайн, тускай шериг операциязы эгелээнинден тура дайынчыларга доктаамал ачы-дузазын чедирип турар.
Бо удаада олар «Ачы-буянның отчугажы» эки турачылар отряды-биле кады чажыртынып шыптынар четкилерни, чоорганнарны, каска иштинге кедер шык тыртпас, дерни бодунче сиңириптер бѳрттер, билектээштерни, кургаг душту болгаш чаагай күзээшкиннерлиг чагааларны дамчыткан.
Элегес-Аксы суму баштыңы Азиада Беляеваның дыңнадып турары-биле алырга, школада болгаш көдээ клубта ийи эки турачылар штавы ажылдап турар. Чеден сес харлыг Елена Иконникова идепкейжилерниң бирээзи.
Энерел сеткилдиг элегес-аксыжылар ачы-дуза чыылдазының доктаамал киржикчилери. Олар тускай шериг операциязында мурнуку одуругда дайылдажып турар оолдарга акша-төгерикти чыып, бичии-ле чайланы бергеш, “чажыртынар” четкилерни, "куяк хепти", оңгуга ажыглаар лааларны дээш шупту херек чүүлдерни кылып турар.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Тыва эки турачылар кудумчузу, 3 («Норзин» Садыг төвү), Ленин кудумчузу, 5 (Тываның күрүне университединде «Кады бис» штавы. Харылзажыр телефону: 2-10-50.
Чуруктарны Буян Ооржак тырттырган
