Тывадан тускай шериг операциязында киржип турар дайынчыларга ачы-дуза чыылдазы уламчылап турар. Кызыл хоорайның Төлээлекчилер хуралының депутаттары «Ачы-буянның отчугажы» эки турачылар пунктузунга чажыртынып шыптынар четкилер кылырынга чугула херек материалдарны чедирип берген.
Кызыл хоорайның Төлээлекчилер хуралының депутады Эрес Саттың дыңнатканы-биле алырга, бо удаада олар 10 ажыг шоодай аңгы-аңгы материалды хүлээткен. «Хоорай депутаттары Тывадан тускай шериг операциязында киржип турар эрес-дидим дайынчыларга бүгү-талалыг деткимчени көргүзүп турар болгаш уламчылаар. Моон-даа соңгаар эки турачылар пунктузун материалдар-биле хандырар бис” – деп, ол чугаалаан.
Тываның күрүне университединиң Шериг өөредилге төвүнүң курсантылары «Улусчу фронт. Бүгү чүүлдү тиилелгеже!» төлевилелдиң доктаамал киржикчилери. Бөгүн Аяс Норбу бирги болгаш ийиги курста өөренип турар өөрлери-биле эки турачылар пунктузунда “чажыртынар” четкилерни кылыры-биле чедип келгеннер.
Ачы-буянның отчугажы» эки турачылар отрядының удуртукчузу Александра Саая-Шагированың чугаалап турара-биле алырга, “чажыртынар” четкилер кылыр материал доктаамал негеттинип турар. “Ийи чыл дургузунда тускай шериг операциязында киржип турар дайынчыларга дузалажып тур бис. Республиканың аңгы-аңгы кожууннарында эки турачыларывыс Тиилелгени чоокшулаштырар дээш үлүг-хуузун киирип турар” – деп, ол ажылын таныштырган.
“Чажыртынар” четкилер-биле дайынчыларның чурттап турар черин, машина-техниказын, шериг объектилерин шып алырга, эскертинмес болуп, камгалаарынга улуг дузалыг.
Тускай шериг операциязында киржип турар дайынчыларга ачы-дуза чыыр пункт дараазында адресте ажылдап турар: Кызыл хоорай, Тыва эки турачылар кудумчузу, 3. Харылзажыр телефону: 2-10-50.
