Бөгүн «Улусчу фронт. Бүгү чүүлдү тиилелгеже!» төлевилелдиң доктаамал киржикчилери – Кызылдың мэриязының өөредилге талазы-биле департаментизи, «Ачы-буянның отчугажы» эки турачылар отряды, Эйлиг-Хемниң эки турачылар штавы дайынчыларга ээлчеглиг ачы-дузазын көргүскен.
Кызылдың 19 дугаар уруглар садының эргелекчизи Вера Ооржактың дыңнатканы-биле алырга, найысылалдың өөредилге албан черлериниң коллективтери тускай шериг операциязында тулчуп турар эрес-дидим дайынчыларга дизельдиг генератор, бензин-биле ажылдаар хирээ, улуг чүък машинар септээр херекселдерни дамчыткан.
Эйлиг-Хемниң болгаш «Ачы-буянның отчугажы» отрядының Элегес-Аксында эки турачылары дайынчыларга чажыртынып шыптынар четкилерни, эм-таңны Улусчу фронтунуң ачы-дуза чыыр пунктузунче хүлээткен.
“Эйлиг-Хемниң авалары аңгы-аңгы хемчээлдиг “чажыртынар” четкилерни кылып, эмнээшкин ап турар дайынчыларга хөректээштерни, чылыг хептерни даарап турарлар” – деп, эки турачылар штавының удуртукчузу Рада Быштак-оол чугаалаан.
Тыва Республикада Федералдыг Казна эргелели бо удаада үш даг мотоциклди, 50 оңгуга ажыглаар лааны болгаш уругларының чаагай күзээшкиннин бижээн чагааларын дамчыдып турар.
Улусчу фронтунуң төлээзи Сергей Белоусов Казна эргелели – тускай шериг операциязының киржикчилерин деткиир акциялар, ачы-дуза чыылдазының доктаамал киржикчилери дээрзин онзалап айыткан.
– Ада-чурттуң Улуг дайынынга Тиилелгениң 80 чыл оюнуң бүдүүзүнде дайынчыларга 14 дугаар чүъктү чорудуп турарывыс бо. Дайынчы хөделиишкиннер девискээринде тулчуп турар дайынчылардан аңгыда оларның өг-бүлелерин база доктаамал деткип турар бис. Бистиң коллективтиң “чалгынының адаанда” тускай шериг операциязының үезинде маадырлыы-биле чок болган чаңгыс чер чурттувустуң хөй ажы-төлдүг өг-бүлези бар. Казначейлер 221 дөрбелчин метр “чажыртынар” четкилерни кылган – деп, эргелелдиң удуртукчузу Солангы Саая дыңнаткан.
Ачы-дуза чыылдазы апрель 28-ке чедир уламчылаар. Тускай шериг операциязында киржип турар дайынчыларга ачы-дуза чыыр пункт дараазында адресте ажылдап турар: Кызыл хоорай, Тыва эки турачылар кудумчузу, 3. Харылзажыр телефону: 2-10-50.
