«Улусчу фронт. Бүгү чүүлдү тиилелгеже!» төлевилелдиң чорудуу-биле Тывадан тускай шериг операциязында киржип турар эрес-дидим маадырларга деткимче көргүзери уламчылавышаан.
Бөгүн «Лунсин» кызыгаарлаан харыысалгалыг ниитилелдиң чиңгине директорунуң дузалакчызы, дээрги Чэнь Кай бодунуң өмүнээзинден «Кросс ХТ300» биле «Кросс Еnduro MTX300» марканың ийи даг мотоциклдиң дүлгүүрлерин Улусчу фронтунуң Тывада салбырының күүсекчи комитединиң удуртукчузу Саима Далчинге дамчыткан.
«Тывада 2007 чылдан бээр чурттап, ажылдап тур мен. Тыва чон экииргек, культуразы байлак. Республикадан чурттун камгалап турар дайынчы оолдарны шыдаар шаам-биле деткип, сеткилимден мототехниканы дамчыдып турарым бо. Даг мотоциклдер орук чок черлерге тура дүшпес хөлге. Тускай шериг операциязының киржикчилерин деткиирин уламчылаар мен» – деп, Кыдаттың хамаатызы чугаалаан.
Саима Далчинниң дыңнатканы-биле алырга, ачы-дуза чыылдазы октябрь 23-ке чедир уламчылаар. Мурнуку шугумда дайынчыларга машина-техника, техниктиг херекселдер, генераторлар улуг хереглелдиг. Чыгдынган ачы-буян чүъгүн 20 тоннаның ийи чүък автомашиназы ийи аңгы угланыышкынче (Курск облазы болгаш Донецк) чедирер.
Тыва 2022 чылдан тура дайынчы хөделиишкиннер девискээринче 320 ажыг тонна ачы-дуза чүъгүн база 230 ажыг автотранспорту чоргуткан.
Тускай шериг операциязында киржип турар дайынчыларга деткимче көргүзер күзелдиг улус «Норзин» Садыг төвүнче (Тыва эки турачылар кудумчузу, 3) кээп болур. Харылзажыр телефону: 2-10-50.
«ТуваМедиаГрупп» медээлер агентилелиниң чуруктары
