Тываның Камбы-Лама эргелелиниң төлээлери, Тыва үндезин культура төвүнүң артистери Шагаа уткуштур тускай шериг операциязында киржип турар дайынчыларга ачы-дуза чыылдазын чорудары-биле республиканың кожууннарынче үнүүшкүннерни чорудуп эгелээн.
Ниити-российжи улусчу фронтунуң Тывада салбырының идепкейжилери мөңгүн-тайгажылар-биле ужуражылганы эрттиргенин кожууннуң чагырга чериниң даргазының [id764690640|Эртине Успун] дыңнаткан.
– Улусчу фронтунуң Тывада салбырының күүсекчи комитединиң удуртукчузу [id446861578|Саима Далчин] бистиң шериг оолдарывыска дайынчы даалгаларын күүседиринге чугула херек аар өртектиг техниктиг дериг-херекселдер садарынга акша-төгерик негеттинип турарын дыңнатты. Тываның Камбы-Лама эргелелиниң башкылары дайынчы хөделиишкиннер девискээринде бистиң чаңгыс чер чурттугларывыска Шагаа уткуштур февраль 28-тен март 1-же дүне мөргүлдер номчууру-биле чоруптарлар.
Мөңгүн-тайгажылар ачы-дуза чыылдазында доктаамал киржип турар. Амгы үеде кожууннуң эки турачылары «Ширээ» садыг төвүнде камгаланып шыптынар четкилер кылып турар. Кожуунувустуң чурттакчыларын ачы-дуза чыылдазынга идепкейлиг киржиринче кыйгырып тур бис – деп, чагырга даргазы медеглээн.
Тываның дайынчыларынга техниктиг дериг-херекселдер садып алырынга дуза кадыксаан улус QR-кодту ажыглап азы чыылданың – сбор.17 регионалдыг агар-санын айтып, акшаны шилчидип болур. Харылзажыр телефону: 2-10-50.
Ачы-дуза чыылдазын чорудары-биле республиканың кожууннарынче үнүүшкүннер январь 30-ге чедир уламчылаар.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Тыва эки турачылар кудумчузу, 3 («Норзин» садыг төвү) азы Цеченлинг хурээзи.
«Бүгү чүүлдү тиилелгеже!» федералдыг төлевилелдиң чорудуу-биле ачы-дуза чыылдазын база чорудулгазын Ниити-российжи улусчу фронт организастап турарын сагындыраал.
