Бөгүн Бүгү делегейниң телевидение хүнү болгаш Россияда Үндүрүг органнарының ажылдакчыларының профессионал байырлал хүнү болурундан аңгыда, Россияда бухгалтерлер хүнү база болуп турар.
Ам бо хүннерде бүгү Россияда бухгалтерлер саны 3 сая 500 муң кижи ажып турар. Оларның ажылындан чүгле кандыг-бир бүдүрелгениң азы албан чериниң саң-хөө байдалы хамааржыр эвес, а бүгү чурттуң экономиказының сайзырал, хөгжүлдези хамааржыр.
Календарьда Бухгалтерлер хүнү кылдыр албан ёзузу-биле тургускан кандыг-бир хүннү кызыл өң-биле демдеглеп, айытпаан-даа болза, Россияның бухгалтерлериниң хөй кезии ноябрь 21-де профессионал байырлалын эрттирип турарлар. Чүге дээрге, 1996 чылдың ноябрь 21-де «Бухгалтер санаашкынының (учёдунуң) дугайында» федералдыг хоойлуга, ынчан Россияның Президентизи турган Борис Ельцин ат салган.
Чамдык улус Бухгалтерлер хүнүн үстүнде айыткан федералдыг хоойлуга ат салган хүнде эвес, ону парлап үндүрген хүннерде (ноябрь 25 биле 28) база демдеглеп турары- Россияда бухгалтерлер хүнүн тодаргай доктаадып, тургуспаанын херечилеп турар.
Бухгалтерлер ажылын шын, чиге санаашкыннарга үндезилеп кылып турар-даа болза, боттарының профессионал байырлалы-Бухгалтерлер хүнүн ам-даа чаңгыс аайлап, тодарадып албаан, «хойтпакталып» каан деп турар…
Профессионал байырлалының хүнүн чиге тодарадып албаан-даа болза, бухгалтерлер чокта бүгү чурттуң ажыл-амыдыралы «хойтпакталып» каап болур.
Ынчангаш Россияның бухгалтерлериниң хөй кезии ноябрь 21-де профессионал байырлалын демдеглеп турар болганда, оларның чымыштыг ажыл-ижинге чедиишкиннерни күзеп, оларга байыр чедирип каары артык эвес.
Мерген КЫРГЫС
