Марттың 14-тен 17-ге чедир Тывага хары угда ийи спортчу маргылдаа: сумога Сибирь федералдыг округтуң чемпионады база эр, херээжен улус аразынга Сибирь федералдыг округтуң спортчу хүреш чемпионады болуп эртер.
Чемпионаттарга тиилээн мөгелер спорттуң ук хевирлеринге бүгү-российжи маргылдааларга киржип, спорт мастери атты камгалап алырлар. Маргылдааларны Совет Эвилелиниң Маадыры Түлүш Кечил-оол Балдановичиниң чырык адынга база Россияда болгаш Тывада чарлаттынган Улуг Тиилелгениң 80 чыл оюнга болгаш Ада-чурт камгалакчызының чылынга тураскаадып эртирер.
Чемпионаттар Тываның Спорт яамызының регионнар аразының, бүгү-российжи болгаш делегей чергелиг күш-культура болгаш спортчу хемчеглерниң Чаңгыс аай календарь планы езугаар эртер болгаш, регионга кадык амыдыралды нептередир, спортчуларның арга-дуржулгазын бедидер база спорттуң ол хевирлерин хөгжүдеринче угландырган.
Тываның Спорт яамызы, ТР-ниң Спортчу хүреш болгаш Сумо федерациязы база Тыва Республиканың чыынды командаларының спортчу белеткел төвү маргылдааны организастап эрттирер.
Сибирь федералдыг округтуң спортчуларының аразынга спортчу хүреш маргылдаазы марттың 15-тен 17-ге чедир болуп эртер. Бөгүн 14:00 шакта «Сүбедей» спорт комплекизинге спортчу хемчегниң байырлыг ажыдыышкыны эрткен соонда, кол маргылдаалар эгелээр.
Красноярск крайдан, Хакас Республикадан, Новосибирск, Иркутск база Кемерово областардан база Тывадан чыында командалар чемпионатка киржирин регионалдыг Спорт яамызы дыңнаткан. Оон аңгыда Омск, Томск областардан, Алтай крайдан база Алтай Республикадан мөгелерниң келирин манап турар.
Красноярск край, Хакас Республика, Новосибирск, Иркутск база Кемерово областарның төлээлери сумо чемпионадынга киржир чагыгны киирген. Тывадан чүс ажыг сумо мөгези хүрежир.
Маргылдааларга 2007 чылда төрүттүнген база оон өрү назылыг, спортчу үшкү разрядтан эвээш эвес, а сумога бирги разрядтан эвээш эвес белеткелдиг спортчулар киржир.
