Бөгүн Тывада Даш чонукчузунуң хүнүн демдеглеп турар. Тываның Баштыңы Владислав Ховалыг салым-чаяанныг ус-шеверлерниң хүнүн таварыштыр байыр чедирген.
– Даш чонар уран чүүлдүң чажыттарын тыва чон салгалдан салгалче дамчыдып берип, салым-чаяанныг ус-шеверлерниң ачызында бо хүннерге чедир кадагалап арттырган. Өгбелеривистиң буруңгу культуразының шак бо хевири бүгү делегейде Тывавысты алдаржыдып чоруур. Уран-шевер даш чонукчуларының ажылдары чүгле Россияның эвес, делегейниң музейлеринде делгеттинген.
Тыва чонар-даш чонукчуларының школазы республикавыстың бир көскү демдээ, бүгү чурттуң культурлуг өнчүзү болур. Республикада өөредилге черлеринде чонар-даш-биле ажылдаарының чажыттарынга өөредип, шеверлер мастерскаялары база ажылдап турар.
2023 чылдан тура албан езузу-биле демдеглеп эгелээнивис онзагай байырлал-биле тыва даш чонукчузу шеверлерге, чонувуска сеткилимниң ханызындан байырым чедирдим! – деп, Владислав Ховалыг бодунуң блогунда бижээн.
