ТР-ниң Көдээ ажыл-агый болгаш аъш-чем яамызы республикада муниципалдыг тургузуглардан «Чер» күрүне программазы-биле көдээ ажыл-агыйынга ажыглаар черлерге хамаарыштыр кадастр ажылдарын кылдыртырынга билдириишкиннер хүлээп алыры эгелээнин чарлаан. Ук кампания февраль 16-га чедир уламчылаар.
Кадастр бүрүткелинге тургузары-биле чер участогунуң турар схемазын белеткеп база бадыладыры, ооң кызыгаарын шыйдырып база чөпшээредири дээн ышкаш кадастр ажылдары ында кирип турар. Ук программа езугаар федералдыг бюджет акша-хөреңгини ажыглап тургаш, ол ажылдарны халас чорудар.
Россия Федерациязының Чер кодекизи, «Көдээ ажыл-агый черлериниң ажыглалының дугайында» деп федералдыг хоойлу база «Тыва Республикада көдээ ажыл-агый черлериниң ажыглалының дугайында» Тыва Республиканың хоойлузу езугаар, бо ажылды хөлезилелде азы хуу өнчүде турар чер участоктарын көдээ ажыл-агыйында ажыглап турар хамаатыларга, юридиктиг черлерге база хуу сайгарлыкчыларга көдээ ажыл-агый черлерин улаштыр аңгылап бээри-биле муниципалдыг тургузуглар (кожуун чагыргалары) хүлээнип алыр ужурлуун демдеглээн.
Оон аңгыда, кампания боттарының черлерин албан езузу-биле бүрүткетпээн, ынчалза-даа бүрүткедирин планнап турар көдээ ажыл-агый угланыышкынныг чер ээлери-биле чер хамаарылгаларын чурумчудары-биле ону кылып эгелээн. Көдээ ажыл-агыйын чорударынга чаа участок алырын планнап турар хамаатылар база ол арганы ажыглап болур.
Бо программага киржип, бодунуң черин бүрүткедир күзелдиг хамаатылар муниципалдыг чагырга чериниң чер болгаш өнчү-хөреңги хамаарылгаларының килдизинче баары чугула. Килдистиң тускай мергежилдиглери шупту херек медээлерни берип, чурумун тайылбырлап, документилерни белеткээринге дузалажыр. Бүрүткел үезинде шупту чүүлдерни тодаргайлап, частырыгларны болдурбас дээш, тускай мергежилдиглер-биле баш бурунгаар харылзажыры чугула.
Көдээ ажыл-агый черлерин ажыглаарының талазы-биле тодаргай тайылбырны ТР-ниң Көдээ ажыл-агый болгаш аъш-чем яамызының үнүш ажыл-агый болгаш механизация килдизинден ап болур: телефонунуң дугаары 9-75-11.
