Каа-Хем кожууннуң Бүрен-Бай-Хаак суурунуң школа чанында «Хүнчүгеш» лагеринде уругларның дыштанылгазын организастаанын ТР-ниң Өөредилге яамызы дыңнаткан.
Лагерьге уруглар келгеш, баштай-ла Кадыкшыл хүнүнге тураскааткан оюн-тоглаага идепкейлиг киришкен. Аңгы-аңгы хемчеглерниң кол сорулгазы – уруглар ортузунга кадык амыдыралды суртаалдаары. Башкылар бодунуң кадыкшылынче кичээнгейни салырының, шын чемненилгениң, спортчу маргылдааларның ужур-дузазының дугайында тайылбырны кылган.
Кадыкшыл хүнүнде уруглар арыг агаарга сула шимчээшкиннерни кылган. Оон аңгыда спорттуң хевирлерин чугаалап, ук темага чуруктарны чураан. Уруглар кадыкшыл темазынга викторинага идепкейлиг киришкеш, угаан-бодал сайзарыдыр ребустарны тыпканнар.
Каа-Хем кожууннуң Бүрен-Бай-Хаак суурунда уругларның чайгы дыштанылгазы солун болгаш ажыктыг эртип турар.
