Бай-Тайга кожууннуң баштыңы болгаш депутаттарының шаңналы дээш 6 хардан 18 хар чедир назылыг болгаш 18 хардан өрү мөгелер аразынга кожуун чергелиг тыва хүреш маргылдаазы болуп эрткенин кожууннуң баштыңы Экер Байс дыңнаткан. Ийи чүс ажыг мөге шаңналдыг черлер дээш ачыр-дачыр тудушкан.
Тыва хүрештиң сайзыралы дээш үлүг-хуузун кирип, деткикчилеп чоруур аалчылар өзүп орар база аныяк мөгелерге чагыг-сүмезин берип, оларның хей-аъдын көдүрген.
Шыырак мөгелерниң хүрежин Бай-Тал сумузунуң хоочуну, кадарчы Сергей Чогээ, амгы үеде Кызыл хоорайда чурттап турар хууда сайгарлыкчы Эдуард Иргит олар деткикчилеп, шаңналдыг черлерге база "Чараш арга", "Чараш девиг" деп тускай шаңналдарга төлептиг болган мөгелерге үнелиг белектерни болгаш акша шаңналдарын тывыскан.
ТР-ниң Дээди Хуралының депутады Айдын Монгуштуң, Бай-Тайга кожууннуң болгаш сумуларының Төлээлекчилер хуралдарының депутаттарының шаңнал фондузу-биле 6 хардан 18 хар чедир назылыг шүүлген мөгелерни демдеглеп, тускай шаңналдарны база тывыскан.
Депутаттар, кожууннуң спорт школазының удуртулгазынга база тренер башкылары хүреш маргылдаазын бедик деңнелге эрттиргеннер.
