Тыва Республиканың чазааның деткимчези-биле “Көдээ ажыл-агый кооперативтериниң материал-техниктиг баазазының эде чаартылгазы” деп программа таварыштыр Бай-Тайга кожууннуң Хемчик сумузунда «Арбай» аттыг көдээ ажыл-агый хереглел кооперативи сүт болбаазырадыр, ак-чем бүдүрүлгезин тургузуп, ону байырлыг байдал-биле ажыткан.
Кооперативтиң удуртукчузу Эрес Салчактың ада-иези шаандан тура Хемчик совхозтуң алдарлыг малчыннары чорааннар. Ынчангаш ол көдээ ажыл-амыдыралды бичиизинден көрүп-билип, ада-иезинге дузалажып өскен.
Боттарынга-даа, чонга-даа ажыктыг болур сүт болбаазырадыр бүдүрүлге ажыдарын Эрес биле Роланда Салчактар өг-бүле чөвүлелинге сүмележип чугаалашкаш, күзелин боттандырып кирипкеннер…
Бүдүрүлгениң ажыдыышкынынга чедир хол-биле тудуп кылыр болгаш саазын кырында документилер долдурар, эрге-чагырга органнарынга оларны дужаар, күрүне деткимчезин алыр дээш төлевилелди камгалаар, бүдүрүлгеге херек дериг-херекселди дилеп-тывар, оларны садып алыр, Тываже эккээр, тургузар, шенелде ажылдарын чорудар дээш дыка-ла хөй ажыл кылдынган.
“Сагган сүттү болбаазырадып, оон шынарлыг ак-чем аймаан (тускай хаптыг сүт, өреме, кефир) бүдүрери- бистиң кол сорулгавыс. Артыкшылдыг сүттү кожууннуң мал тудуп турар чонундан төлевирлиг хүлээп ап, оларга база амыдыралынга акша ажылдап алыр аргаларын бо биче бүдүрүлге бээр”-деп, Эрес Ким-оолович чыылганнарга чугаалаан.
Чаа ак-чем кылыр бүдүрүлгени ажыдарынга дузалаан Тываның чазаанга «Арбай» кооперативтиң удуртукчузу Эрес Салчак өөрүп четтиргенин илеретпишаан, бүдүрүлгени улам хөгжүдүп, эки ажылдаарын аазаан.
Бай-Тайга кожууннуң удуртулгазы чаа бүдүрелге ажыттынганы-биле ооң ээлеринге байыр чедиргеш, чоннуң амыдыралынга ажыктыг чүүлдү кылганынга өөрүп, кады демниг ажылдаарын, херектиг үеде дуза кадарынга беленин дыңнаткан.
Бай-Тайга кожуун чагыргазының медээзи-биле
