Тываның ыдык дагларының бирээзи – Бай-Тайга дааның бажында овааны дагыыр езулал соонда эр кижиниң үш оюнун эрттиргенин чагырга чери дыңнаткан.
Чүгүрүк аъттар чарыжы. Аныяк аъттар (2 харлыг) чарыжынга баштайгы үш байзаны – Кызыл-Даг сумузундан Альберт Аптыының калдар аъды, Хемчик сумузундан Херел Салчактың калчан-кара аъды, Кызыл-Даг сумузундан Артыш Күжүгеттиң доруг аъды эрткен. Аныяк аъттар (4 харлыг) чарыжынга Хөнделеңден Алаш Сарыгларның калдар аъды, Тээлиден Ратмир Хомушкунуң калчан-хүрең аъды, Ээр-Хавак сумузундан Аяс Очурнуң кара аъды эрткен. Улуг чүгүрүк аъттарның чарыжынга Хөнделеңден Аяс Күжүгеттиң доруг аъды чемпионнаан. Ийиги черге Аксы-Барлыктан Салават Иргиттиң калчан-калдар аъды, үшкү черге Барлыктан Буян Салчактың калдар аъды келген.
Хүреш маргылдаазынга бирги-ийиги черлерни Чөөн-Хемчиктен Мөңге-Эртине Куулар биле Сайын-Белек Монгуш ээлээн. “Эң-не чараш девиг» – Бай-Тайгадан Кызыл-Кат Даржаа, “Эң-не чараш арга” – Бай-Тайгадан Аймир Монгуш.
Тыва ча адар оюннуң баг адар хевиринге маргылдаага бирги черге Чаа-Хөлден Доктугу Алдын, ийиги черге Чөөн-Хемчиктен Тимур Шагжы, үшкү черге Бай-Тайгадан Сылдыс Монгуш төлептиг болган.
Бай-Тайганың бедии – 3128 метр, ооң эдээн – тундра база холумак тайга шыпкан.
