Чылдың-на Бай-Тал суурга бөмбүктүг хоккей маргылдаазын эрттирери чаңчыл болган. Эрткен дыштаныр хүннерде кышкы оюннуң ажыдыышкыны болганын чагырга чери дыңнаткан.
Бо удаада республика чергелиг спортчу хемчегни Тываның бөмбүктүг хоккей маргылдаазының каш дакпыр чемпиону Виктор Авыр-оолдуң чырык адынга тураскаадып, хоккейжиниң 75 харлаанынга уткуштур, ооң ажы-төлү биле төрелдери эрттирген.
Ийи хүн үргүлчүлээн маргылдаага республиканың аңгы-аңгы булуңнарындан тос команда киришкен. Бирги черни Ийи-Тал (Улуг-Хем), ийиги черни Кызыл-Даг (Бай-Тайга), үшкү черни Россияның Онза байдалдар яамызының Тывада Кол эргелелиниң Бай-Тайгада кезээ, дөрткү черни Бай-Тал (Бай-Тайга).
Хоккей сезонунуң ажыдыышкынынга Тываның бөмбүктүг хоккей федерациязының президентизи Май-оол Иргит база Бай-Тайга кожууннуң баштыңы Роберт Аракчаа олар чыылганнарга байыр чедиргеш, ойнакчыларга чедиишкиннерни күзээн.
