«Байлак» уругларның кадыкшылга лагерин бүдүн чыл дургузунда ажылдаарынче шилчидер

Россияның Президентизи Владимир Путин Тывага «Байлак» лагерин бүдүн чылда ажылдадыр арганы өөренип көөр айтырыгны даандырган.

Президент 2024 чылдың сентябрь 2-де Тывага кээп чорааш, Тываның школачылары-биле ужуражылгазының түңнели-биле элээн каш даалгалар даңзызын бадылаанын Тываның Баштыңы [id360104045|Владислав Ховалыг] бодунуң хууда блогунда ооң дугайында дыңнаткан.

Чаа өөредилге чылында Кызыл хоорайның Вавилин ээтпээнде ажыттынган Ада-чурттуң Маадырлары аттыг 20 дугаар чаа школага ужуражылга болганын сагындыраал. Владимир Путин «Чугула чүүлдер дугайында чугаа» деп ажык кичээлди өөреникчилерге эрттирген.

Күрүнениң баштыңы Улуг Тиилелгениң 80 чылының бүдүүзүнде оолдар-биле чугаазында аңгы-аңгы темаларны көрген. «Президент, Билиглер хүнүнде, уругларның болгаш аныяктарның ада-чуртчу кижидилгезиниң дугайында хөйнү ынчан чугаалаан. Фашисчи Германия-биле демиселде ССРЭ-ниң бирги эвилелчизи болган Тыва Арат Республиканың ролюн Владимир Владимировичиниң демдеглээни, биске онза үнелиг» – деп, Владислав Ховалыг сагындырган.

Сентябрьда чугааның түңнели-биле Президентиниң элээн каш даалгаларындан тургустунган албан езунуң доукментизи Кремльдиң сайтызында парлаттынганын Тываның Баштыңы дыңнаткан. Ол даалгаларның аразында: регионнарга школачы шериг-спортчу лагерьлерни чаагайжыдары, Россияның “Тиилелгениң оруктары” бүгү-российжи шериг-ада-чуртчу программазын ажылдадыры, өөреникчиниң идепкейиниң календарын тургузуп, “Сферум” өөредилге шөлүнге ону кожарының аргазын калбартыры кирген.

Оон аңгыда Кызылдың 9 дугаар гимназиязының өөреникчизи Батаа Санчаттың күрүне Баштыңынга илереткен күзели – «Байлак» уругларның кадыкшылга лагерин бүдүн чыл дургузунда ажылдаарынче шилчидер дугайында пункт даңзыда кирген.

– Ону албан кылыр бис. Бо аныяктарның, школачыларның, сургуулдарны, студентилерниң дыштанып, кандыг-бир хемчеглер эртип турар черлеринге хамаарыштыр – Россияда ындыг черлер элээн хөй, оларның саны көвүдеп турар – ол кончуг шын, ам-даа ол шугум-биле чоруур бис. Ынчангаш ол херек. Иштежилерим-биле Тываның хөгжүлдезин сайгарып чугаалажырда, бо талазында хөгжүлде программаларынга силерниң саналыңарны база ажылдың ол хевирин өөренип көөрүн РФ-тиң Чазаанга болгаш администрацияга дагзырын аазап тур мен – деп, В. Путин өөреникчиниң дилээнге ынчан харыылаан.

Республиканың эрге-чагыргазы бо айтырыгны удавас федералдыг чазакка ажылдап эгелээрин, 2025 чылдың февраль 15-ке чедир Президентиге чогуур илеткелди киирер ужурлуг дээрзин Владислав Ховалыг чугаалаан.