Тайга-сын ажыр Тере-Хөл кожуунда шээр, бода, чылгы, иви малдан аңгыда сарлыкты база азырап, өстүрүп турар. Мал бажының саны сөөлгү чылдарда көзүлдүр-ле өзүп көвүдээн.
Амгы үеде Тере-Хөлде ниитизи-биле 5171 баш бода, 6964 баш шээр, 1470 чылгы мал, 700 ажыг сарлык болгаш 40 хире иви бар.
«Балыктыг» көдээ ажыл-агый бүдүрүлге кооперативи – Тере-Хөл кожууннуң улуг мал ажылдыг бүдүрүлге чери. Балыктыг сумузунуң девискээринде, Дагыы черде шээр, бода, чылгы малды база 600 ажыг сарлыкты малдап турар.
Эрткен чылын Наадымга эки көргүзүглерлиг мурнакчы малчыннарга көшкүн амыдыралынга ажыктыг эт-херекселдерни тывыскан. Чайгы, кышкы турлаглар аразынга көжер-дүжерде-даа эптиг, дугуйлуг чунар-бажыңны ук бүдүрүлгениң сарлыкчызы Анай-Хаак Чигжит белек кылдыр алган. Көдээ ажыл-агыйын хөй чылдар дургузунда Оксана Сенди билдилиг удуртуп турар.
Мал чемин четчир кылдыр белеткеп, курлавырлап алыры – кышты хүр ажарының магадылалы. Кожууннуң чагырга чериниң дыңнадып турары-биле алырга, 3800 тонна мал чемин 2000 ажыг гектар сиген шөлүнден ажаап алыры планнаттынган. Тере-хөлчүлер cиген кезилдезинче август айда дигии-биле шымнып кириптерлер.
