Бараан бүрүзүнүң өртээн шын айыткан турар ужурлуг

ТР-ниң экономиктиг хөгжүлде болгаш үлетпүр сайыдының оралакчызы Снежана Ховалыг садыгларда барааннарның өртектерин биживээнинге хамаарыштыр.

– Амгы үеде, болганчок-ла садыгларда барааннарның өртектерин биживээн болур. Чок-ла болза, өртээн бижээн-даа болза, өске медээлерин айытпаан болгулаар. Чок-ла болза, өртээн бижээн саазында бир өске түң, а кассага баарга, өртээ өске болур. Ол дээрге садып алыкчы кижиниң эргелерин хажыдып турары-дыр.

Бараан бүрүзүнүң өртээн шын айыткан турар ужурлуг. Садыгжы шупту өртектерни бижип айтыр хүлээлгелиг, ооң-биле садып алыкчыга шилиир арганы кылып турары ол болур. Өртектер бижээн саазынга бараанның адын, өртээн азы ооң хемчээлин айтыр ужурлуг.

Бир эвес силерден өртекте айытканындан хөй түң негээр болза, садыгның администрациязынга барып, айтырыгны тургузур болур. А бир эвес бараанның өртээн төлепкен болзуңарза, ажыр төлээн акшаңарның ылгалын эгидип ап болур силер.

Бодуңарның акша-хөреңгиңерни канчаар камнап алырының база саң-хөө талазы-биле билииңерни бедидер дизе, Объясняем.РФ порталдан медээлерни көрүп болур силер.